الوسم: الرحيل

——————————————————————————–

"و د ا عآ "

حروف تفرقت لتعلن الفراق..

وداعا ..

لأحلام رفعت الحظر عن الألم

لقصور تهادت تحت نسمات أمواج الحياة

لابتسامة ارتسمت على ثغر نسي الفرح

لبصيص الأمل الذي عانق رفات الأوراق المبعثرة

وداعا

تلك الكلمة التي لطالما داعبت شفتي وارتعشت خجلى تنشد البوح

وداعا

عندها وقفت طويلا في منتصف الطريق ..

نظرت حولي ..

لأجدك أمامي ..

لكنك بعيد..

سافرت عيناك طويلا ..

لتذكر ..

سذاجة طفل..

وقد تتذكري عفويته أو غموضه ..

تبتلعك الدروب ..

فتبتعدي..

تنشغلي عن الطفل ..

تعود عيناك لتجول بحثا عنه .

.يبتلعه المكان..تشتث الرؤيا بين صخب المكان

تنبس شفتاك بكلمة واحدة :

إلى اللقاء

لا بل هو الوداع..

فلنودع معا الأمل المتناثر على صفحات أحلام وذكريات مضت..

وليعد كلانا إلى الواقع

ولنفتح ذراعينا لاستقبال حياة األم وأمل..

فشكرا..

لولا أحلامك..

دفء كلامك.

.وعطفك ما عشت

أتعثر في جراحي التي لملمتها يدك..

وداعا ..من أجلك ومن أجلي

ولا تحزن فبعد الفراق لقاء..

لقاء جديد..حياة جديدة..

آلام مستجدة..

أحلام وليدة..

وتبقى الذكرى ..

أحلى ذكرى …

ذكرى لقاء في غفلة من الأحزان..

قد تتذكريهاوم

وأنتي جالسه على صخرة قرب أمواج البحر تنتظري

استقبالها بذراعين مفتوحتين عاليا فتشعري بجود أحضان البحر

بمدرسة البنات الثانويه

تحديداُ .. صف ثالث ثانوي ..

البنات قفل راسهم من الرياضيات وقلقهاا..

وماعادوا يستوعبون شي .. يعني انواااع الدروخه ..

الأستاذه: هاه فهمتوا ..؟؟

والبنات مالهم حس من التعب

الأستاذه: ايه؟؟ فيه ايه ؟؟ مالكوا اتكتمتوا ؟؟

دلال: يا أستاذه صدعت روووووسنا .. يعني حتى بآخر الحصص رياضيات ..

منال: من جد .. وليتها أساسيه كل ماشفتوا فراغ عبيتوه ..

الأستاذه: هو انا جايبه مناهجكم من عندي ؟؟ انتوا تالته لازم تتعبوا ..

هديل: اووف خلاص خلاص روقنا .. كملي يا أستاذه خلينا نخلص تكفين ..

لمى حست بدوخه وتعب .. وقامت تبي تطلع من الفصل

لمى: أستاذه معليه بس تعبانه شوي وأبي أروح الحمام ..

الأستاذه: انا مش عارفه ازاي حتخشوا جامعه .. روحي روحي ..

طلعت لمى وهي تتثاقل خطواتها .. وتحس الدنيا تلف فيها ..

فتحت باب الفصل وطلعت ..

هديل إلتفتت لها .. وشهقت ..

…………………………

بيت أبو مهند

أم مهند تنادي ساعه على مهند .. وهو مايرد

طلعت من المطبخ وراحت لغرفته ولقته بسابع نومه ..

أم مهند جلست تصحي فيه والأخ مو حاس ..

أم مهند: يامهند قوم تكفى أذيتني

مهند متنح: ياليل وشو يمه بنااام تكفين ..

أم مهند: رح جيب أختك وبعدين إرجع نام ..

مهند: شوفي الساعه كم باقي نص ساعه على طلعتها

أم مهند: وانت ساعتك بسنه خلصني رح الحين

ورجعت أمه للمطبخ .. وهو يتأفف وميت نوم ..

………………………

بالأوتيل جالس سامي وشلته المصون

حمد: هاه نطلب الحين ..؟

ساره: ياليت جوعانين

عادل: انا فدى الجوع ..

نوره: ههههه من قدك ياساره ..

ساره: لا انا ودي أسمعها من سامي ..

سامي وهو قرفاان: اففف اقول روقيني من هالسوالف .. وبعدين انتوا وش بتطلبون

فطور؟ ولا غدا ؟ وش نظامكم الحين وقت أكل ؟

حمد: يابن الحلال هد عمرك وترانا جواااعه..

سامي: جواعه !! .. اطلبوا خلصونا ..

عادل: انت من مزعلك ع هالصبح ..

سامي: ماحد يلا بس اطلبوا ..

نوره: وانت يعني ماتبي شي ؟

سامي: لا بآخذ توركش كوفي ..

…………………………

الأستاذه مخترعه: بسم الله .. مالك ياهديل ..؟؟!!

هديل تصرخ: لمى

وانتبهوا لها البنات وقاموا بسرعه ..

لمى فجأه داخت وطاحت بألارض وماعادت تتحرك

منال: لمى وش فيك ؟؟

دلال: نادوا أحد ولا جيبوا عطر بسرعه

جات المشرفه والمديره يشوفون لمى

المديره: بسرعه خلونا جيبوا لنا عطر .. وخلونا نوديها المستشفى

هديل: لا ليه مستشفى يمكن الحين تقوم ..

المديره: لاطبعاً لازم هذي مسؤوليه علينا .. اطلبوا الاسعاف لها..

هديل جلست تبكي من خوفها على لمى

المديره: خذوا هديل الحين وبسرعه ساعدوني خلنا نوديها حنا.. أسرع.. بدال الاسعاف

دلال خذت هديل ودتها غرفة المشرفه عشان تهدى وترتاح ..

المديره خلت المساعده تكلم أهل لمى وتعطيهم خبر

………………………… ….

بيت أبو خالد

نهى توها راجعه من الجامعه وهلكانه

وعلى طول تركض عالمطبخ

نهى: وشو الأكل .. لايكون ماخلص ..

أم خالد: لا اله الا الله .. خلص امشي احط لك

نهى: اي ميته جوع ..

أم خالد: والله يابنتي من عرفتك وعرفتيني وانتي ميته جوع .. الله يخلف علي بالجنه

نهى: اووه يمه كله أكل

أم خالد: تغدين ماعاد تدخلين من الباب

نهى: بسم الله علي .. يلا بغير واجي أتغدا ..

نهى وهي طالعه فوق .. صادفت خالد ..

نهى: ماشاء الله راجع مبكر ..وش عندك؟

خالد: لا ابد بس اليوم مداوم بالبيت..

نهى: ليه ؟؟!!

خالد: ودي اريح .. مايصير ؟

نهى: ايه ايه كفوك يلا وخر عني .. ابي اغير وانزل اتغدا

خالد: والله اني شاك فيك ..

نهى مستغربه : ليه ؟!

خالد: اضن ان بمعدتك دود ..

نهى: وجععع حتى وجع .. بسم الله علي

خالد: يعني معقوله ..! عص وتاكلين اكل الشر ..!!

نهى: يممممه الله يكفيني شرك .. انا الغبيه واقفه اكلمك .. وخر بس وخر

خالد: بوخر لاتاكليني بطريقك.. ماني بايع روحي ..

راحت نهى تبدل بسرعه ورجعت تتغدا

نهى: هاه يمه وين الأكل ..؟

أم خالد: حطيته لك بالصاله ..

راحت نهى ولقت خالد

نهى: ياليل

خالد طالعها بنص عين وهو يضحك

نهى: خالد حط هذيك القناه اللي يجي فيها المسلسل ..

خالد: ابي جمله مفيده .. بعدين انا بتابع المباراه

نهى: اقول هات بس انا احطها .. وخلك من المباراه .. روح لدلال بس بتطلع الحين ..

خالد: تو باقي لها ..

شوي ويدق جوال نهى

نهى: هااااه .. وش تبين أكل ..

خالد قرفان منها: الله يحوم كبدك ..

نهى: يوووه طيب طيب .. يلا طسي ..

سكرت نهى ولفت على خالد

نهى: يلا انت الثاني رح جيب اختك ؟

خالد: الحين ؟! .. ليه باقي؟

نهى تصارخ: وش يدريني انا …؟

خالد: وجع قصري حسك

نهى : مادري عنكم اذيتوني ابي اعرف ليه ماتكلمك بدال ماتكلمني ؟؟

ماعندك جوال ولا ماعندك ؟؟

وبعدين عجل وياها صديقتها دلال بتجي

خالد لف ع نهى: والله ؟

نهى: يمه خلني اتهنى بغداي طس لها وفكني

خالد قام: بطس .. جعلك تغصين ..

خالد طلع من هنا ونهى اللي تغص غصه .. ربي رحمها ما ماتت

………………………… ….

المديره (سمر) والمشرفه (ليلى) ودوا لمى المستشفى ..

وجلسوا ينتظرون الدكتور يفحص عليها ..

سمر: كلمت ندى (المساعده) اهل لمى قبل مانطلع ولا ؟؟

ليلى: الا شفتها تكلمهم..

سمر:اي زين .. ان شاء الله مافيها شي ..

ليلى: ان شاء الله .. تبين اجيب لك شي تشربينه..

سمر: خليني انا وياك نروح نجيب شي ونرجع لها..

وراحوا يشربون شي ويجون ..

………………………… ………

مهند قبل مايطلع جاته أمه تبكي

مهند: يمه وشفيك بسم الله ؟؟!!

أم مهند: مدرسة أختك كلموني يقولون تعبانه .. امش بسرعه ودني المستشفى ..

مهند: ليه المستشفى وش صاير ؟؟!!

أم مهند: مادري مادري يلا بسرعه خلنا نروح ..

مهند: يلا يلا بس سمي بالله لايجيك شي انتي بعد ..

أم مهند: لا اله الا الله .. عجل تكفى ..

وراحوا للمستشفى

………………………… ……….

بالفصل… جالسين هديل ومنال ودلال ..وضايقه صدورهم على لمى..

منال: تهقون وش فيها ؟

دلال:مادري والله .. ان شاء الله بس دوخه وتروح ..

هديل: رجعت تصيح

دلال: ياربي.. هديل تكفين عاد.. مافيها شي ان شاء الله

هديل تمسح دموعها: ان شاء الله

الأستاذه انتبهت لهم

الأستاذه: تفضلوا اطلعوا برى

والثلاثه متنحين ولاكأن احد يكلمهم

الأستاذه: ايه مابتسمعوش ؟؟

البنات انتبهوا انها تطالع فيهم

منال: انتي تكلمين مين ؟!

الأستاذه: بكلم مين يعني انتوا ؟

منال: وليه نطلع ؟!!

الأستاذه : عشان بتتكلموا ..

منال: لا والله .. تكفين قولي قا ..

دلال قرصت منال عشان تمسك لسانها

دلال: معليه حنا اسفين ..

الأستاذه: اصرفها فين دي ؟؟

منال بصوت واطي: انا اشهد انك ماديه ..

هديل وسط دموعها جلست تضحك من كلمة منال

منال: يابنت الحلال وش بلاك انتي؟؟ خايفين على رفيقتنا وجلسنا نهدي هالقطوه (تقصد هديل)

الأستاذه: انتي بتشتمي ؟؟

منال مفتحه عيونها: وش اشتم..؟

الأستاذه: امال اي القطوه دي ؟

البنات جلسوا يضحكون

منال: انا اشهد انك ماتخبرين وين ربي حاشرك معه ؟

القطوه ذي الله يرج مختس .. بسه ياختشي..

الأستاذه: انتي بتتكلمي ازاي ؟

منال: من فمي ..

الأستاذه: ايه ياست منال بتستعبطي عليا ..

منال: هذا فرق اللهجات وتكفين يرحم امتس تروقينا ..

الأستاذه: ماشي يامنال ..

منال بصوت واطي: الله لايمشي لك حال ..

دق باب الفصل ودخلت المشرفه عشان يطلعون هديل ودلال ..

منال: على وين يالخاينات ..؟

دلال: بروح مع هديل ..

منال: خذوني ..

هديل: ياليت تجين ..

منال: ولا اقولكم خلوني احسن لا امي تدبغني .. الوعد الليله عندي ..

دلال: اوكي يلاباي ..

وراحوا هديل ودلال

………………………… ..

كان شكله قلقان ويدور على شي .. دخل بهدوء لغرفة لمى

شكله أنيق وملامحه رجوليه وجذابه حيل ..

خصوصاً نظرة عيونه .. أحلى مافيه ..

شاف شكل لمى .. كانت ناعمه .. وبريئه وهي نايمه ..

ماقدر مايقرب منها .. ويمسح على راسها وخصلات شعرها الناعم..

كانت أجمل من الجمال .. وغصب عنه بقى يناظر فيها ..

شوي ورجعوا سمر وليلى

سمر: شكله الدكتور طلع ؟

ليلى: يمكن جاوا اهل لمى وهو يكلمهم ..

سمر: امشي اجل ندخل نشوفها ..

دخلوا وشافوا .. رجال واقف عند لمى .. وإستغربوا ..

سمر بصوت واطي: من ذا ؟

ليلى: يمكن اخوها !

وفجأه إلتفت هو لهم ..

لما إلتفت جلسوا يطالعون فيه وهم متنحاااااات لآبعد حد..

هذا وهم مربيات أجيال .. الله يعين المراهقين ..

شوي وإستوعبت سمر نظراتهم وتتنيحتهم

سمر: لو سمحت إنت أخوها ؟

ياسر: لا ..

ليلى: هاه ؟ اجل وش جالس تسوي هنا ؟

ياسر: اللي تشوفونه ..

سمر: ماتستحي ؟؟!! تفضل إطلع برى .. وهذا وحنا نحسبك محترم

ليلى دقت يد سمر وساسرتها

ليلى: وش جايك كنك موشايفه خير .. تلاقينه واحد قليل حيا خلنا نطلب الأمن لايجون أهلها ..

سمر: طيب طيب

سمر: تفضل اطلع برى يلا .. قبل ما أنادي لك الأمن ..

ياسر: ناديهم ..

ليلى : لا ياشيخ !! .. قوي والله ..

ياسر: ممكن تقصرون حسكم .. ماتشوفون البنت نايمه

سمر: شف بعد فوق شينه قواة عينه ..بأي حق تدخل هنا إنت

بهالوقت صحت لمى وإنتبهت لهم

لمى إنتبهت لياسر: ياسر ؟ .. وش جابك ..

ياسر دنق لها : الحمدلله عالسلامه جيت أتطمن عليك ..

لمى: الله يسلمك .. انا طيبه بس أبي ارجع البيت

سمر وليلى ماعادوا فاهمين شي

سمر: ارتحتي شكله يعرفها ..

ليلى : يوه وش يدريني انا ..؟

لمى سمعت اصواتهم بس مافهمت وش يقولون .. وطالعتهم ..

قربوا منها .. وتحمدوا لها بالسلامه ..

ليلى : ياخوي تونا نسئلك تقول مو اخوها .. ليه يعني تقول انك مو اخوها ..

وتخلينا نغلط عليك كذا ..

لمى عقدت حواجبها وطالعت ياسر

ياسر: انا ماكذبت انا مو اخوها ..؟

سمر بتنهبل: اجل انت مين وشلون تدخل عليها ؟؟

ياسر: الحين انتوا ماتعرفون تتكلمون بأسلوب زين ؟؟

قولوا مين انت من الأول وفكنا .. يعني اذا مو اخوها.. خلاص ما أحل عليها !

بهالوقت دخلت أم مهند ومهند

أم مهند على طول راحت تضم لمى

أم مهند: يابعد قلبي وش فيك..

لمى: مافيني شي دخت بس ليه البكي؟

أم مهند: أكيد مافيك شي؟

لمى: والله مافي ..

مهند: سلامتك حبيبتي

لمى: الله يسلمك ..

انتبه مهند لياسر وسلم عليه

وأم مهند شكرت سمر وليلى .. عاللي سووه ..

أم مهند: لا اله الا الله .. قلبي بغى يوقف ..

لمى: بسم الله عليك ..

مهند: قومي يمه نقيس ضغطك ..

لمى: اي يمه تكفين عشان خاطري

ياسر: انا اقول تقيسين الضغط .. وبعدين تروحون البيت ..

وخلوا لمى انا بوديها تتغدا .. لآن هالدوخه من قلة الأكل ..

مهند: انت كلمت الدكتور ؟؟

ياسر كان يصرف الموضوع: اي اي كلمته انتوا بس روحوا وماعليك

أم مهند: هاه لمى حبيبتي تروحين مع ياسر ..؟

لمى: انتي روحي ريحي تكفين ..

أم مهند: زين اجل .. انتبه لها تكفى

ياسر مبتسم: بعيوني ..

طلعوا مهند وأمه.. وسمر وليلى قاعدين شكل اللقافه ذابحتهم يعرفون من ياسر هذا

ياسر حس فيهم وغمض عيونه وجلس يضحك

لمى مستغربه: وش فيك ؟

ياسر: سلامتك .. اقول يا أستاذات مشكورين ماقصرتوا والله ..

ليلى: لا ابد ماسوينا شي ..

ياسر: لمى نروح ولا تبين شي ؟

ياسر: لا تبي سلامتكم خلاص انا وياها ..

سمر وليلى بيموتون قهر

لمى مبتسمه: مشكورين وماقصرتوا معاي والله .. ادري تعبتكم

ياسر رجع يضحك ضحكه خفيفه

ياسر: حبيت بس اقولكم تطمنوا على لمى .. لآني بحطها بعيوني ..

تعرفون عاد … ( سكت شوي ورجع يكمل )

……………..

وحيد وما على باب الوحيد إلا وداع أحباب
………………………وأن ا بابي تركته للهبوب .. يودع أحبابي
تعبت آعد خطوات الرحيل وكم وجه ٍ غاب
……………………..ترقب ت الكثير وما ظهر واحد على بابي
أكابر للملا ولاحشاي يدور الأسباب
……………………..فقدت أحباب كانوا عزوتي ومناي وأصحابي
يمر أسمي مابين عقولهم صفحة بوسط كتاب
……………………..وهم وجه الكتاب بدنيتي وأغلا من كتابي
صواديف الحياة تعلم الخايف متى يرتاب
………………………وحن يني للخلايق ماهو الا عذر لغيابي
إلا رفت شوارب من تصدى للهبوب يهاب
………………………وال اهب الهبوب وزاد شره يحسب حسابي
انا البحر الغزيز بصدري المفتوح للغياب
……………………….وأ نا راس الجبل بمعانق الطولات لأقرابي
وأنا السيف الشطير بشعري الواضح عليه عتاب
……………………..يفج صدور ناس ماتحس بقسوة عتابي
وأنا كل ماطرى في بال من خذه الزمان وغاب
…………………….مكاني هو مكاني لا رحل وترابي ترابي
تناسيت الوجيه ودورت الأيام قفل الباب
…………………….كأن الوقت حالف مايرد وجيه غيابي
تراودني حلو إني كبرت وشعر وجهي شاب
……………………..تعبت من السنين ومانشف دمعي على أهدابي
خطاي اكبر كثير من الترجي من ثنين أحباب
…………………….خطاهم شاب من كثر الوجع لوكان متصابي
انا خلي حنون وضحكته مابين ناب وناب
…………………….تخايل للخلايق بأنه أكثر من عرف مابي
يداريني عن وفا بين اليالي فص ملح وذاب
…………………….يخاف من البكا وأهون عليه يعيش متغابي
وش أرجي والزمن كل ماخذا مايوم مره جاب
…………………….قسى قلبي وطالت غربتي وإحترقت أعصابي
وحيد إيه والله إن مثلي وحيد وماوراه أحباب
…………………….عسى الله يجزي سنين الوصال ويرحم أحبابي

اقتباس:

المشاركة الأصلية كتبت بواسطة ياعذب الحب موجعه بالحيل لاحمل الا كل شكر لكي كلامك داخل وجداني واصلي ,,,,,,,,,,,,,, لاتياسي فسيأتي يوم تفرحين فيه وستحصدين ثمار صبرك بأذنه

العفو ياقلبي