ان شاء الله تعجبكم الأكلة إلى حضرتها
هي خاصة بمسابقة تسلم الأيادي
هي أكلة جزائرية و خاصة بالشرق الجزائري
و لتعملوها ……….تابعوا معي الخطوات ^^
للعجينة:
1/4كغ سميد النوعية الجيدة
ملح (عينك هي ميزانك)
ماء(حتى تتماسك العجينة)
هذه الكمية دير حوالي 6 كريات
(آسف على الصور لأنها ماهي موجودة لأنو أحنا نعمل الثريدة في فصل الربيع تحضيرا لشهر رمضان الكريم)
طريقة التحضير:
نقوم بخلط المكونات السميد ..الملح و الماء و نعجن حتى نتحصل على عجينة متماسكة نتركها مدة من الزمن حوالي نصف سآعة ثم نعجنها من جديد مليح و نشكلها كريات صغار نحلو كل كرية بالحلال (القنوط) حتى نتحصل على قرص كبير سمكه حوالي 2 مم (لازم تكون رقيقة) نتركها حتى تجف (حطو كل وحدة وحدها ما تحطوهمش فوق بعض) كي تجف( مايش كي تيبس) نقطعها مربعات صغيرة بواسطة سكين حاد احفظوها في مكآن جاف حتى يجي النهآر إلى تحبو طيبوهآ فيه ممكن تحفظوها لمدة شهر نورمال المهم في مكان جآف ^^
تحضير الصلصة:
* لحم أو دجاج حسب الرغبة (أنا عندي الطبقين بالدجاج و باللحم)
*حبة بصل صغيرة مفرومة
* 1/2 حبة طماطم صغيرة مبشورة
1/2 ملعقة طعام طماطم مصبرة
*فص ثوم مبشور (حسب الرغبة)
* 6 ملاعق زيت
*ملح و فلفل أسود
* حمص منقوع للتزيين
* ملعقة قهوة زبدة نحتاجها في النهاية
* 1/2 لتر ماء
* إلى يحب الحار ممكن يضع فلفل أخضر
طريقة التحضير:
قلي البصل في 4 ملاعق من الزيت مع اللحم و الملح و الفلفل الأسود
خليهم مدة مع بعض ثم نضيف الطماطم المبشورة و الطماطم المصبرة و الثوم المبشور
كي يتقلاو مليح نضيف لهم الماء (الثريدة ما تحبش لاصوص بزاف مقدار ما تغطيو اللحم باه يطيب برك)
من جهة أخرى نحضر الثريدة … ندهن الكسكاس بالزيت لتجنب التصاف الثريدة
نضع الثريدة بداخله و نضيف لها ملعقتين من الزيت و نخلط بيدينا بالعقل برك حتى ما تتكسر
بعد مدة من غليان الصلصة نضع الثريدة تفور (تطهى على البخار)
و هذا هو الكسكاس و البرملة إلى نطيبو فيهم
كي تفور (يتصاعد البخار)ننزعها و نرشها بقليل من الماء و الزيت (حوالي 1/2 فنجان ماء+زيت) و برفق نحلوها بأيدينا
نكرر هذه العملية من مرتين إلى ثلاث مرات حتى تصبح الثريدة لينة نوعا ما
(كي تعودوا تعاودو فيها بالماء و الزيت غير بالعقل لا تتكسر و ما تكثروش الماء و لا تولي عندكم عجينة مايش ثريدة 
و تلصف كل في بعضاها)
عندما ننتهي من هذه الخطوات نضع الثريدة في طنجرة مع الصلصة (ما تحطوش بزاف الصلصة)فوق نار هادئة
إذا طابت حطوا شوية زبدة و حركوها بالشوكة غير بالشوية
و زينوها بالحمص (إذا جات ناقصة طياب زيدولها شوية تاع لاصوص)
و هذا الشكل النهائي : الثريدة بالدجاج
و هذا الشكل النهائي: ثريدة باللحم
و شهية طيبة
لكل من لم تفهم لهجتي و أو طريقة تحضير الأكلة
أنا في الخدمة
و جاهزة لأي استفسار
صح فطووركم
