الجزء الخامس
المهم!!
بعد اجتماع أم العريس وخالته بأهل اسمهان انتهت الجلسة..وكان خلاصتها انه أم اسمهان حققت معاهم لين ماعرفت مكان عمل عريس الغفلة(عبدالرحمن)..وبعض المعلومات اللي تساعدهم في رحلة السؤال عن ولد الناس لمعرفة إن كان يصلح لاسمهان هانم ولا لا!!!
وراحت ام اسمهان توصلهم لين الباب وكانوا يلبسون عباياتهم وقالت:بإذن الله نحدد لكم بوقت قريب موعد عشان ولدكم يقابل أبونا…ويتعرف عليه..
أم عبدالرحمن:ان شاء الله بس لاتطولون علينا الله يعافيكم…
وتوادعوا وراحوا أهل المعرس للسيارة اللي يسوقها عبدالرحمن!!
وجرى الحديث الاتي:
الأم والخالة:السلام عليكم ورحمة الله وبركاته!
عبدالرحمن:وعليكم السلام..هلا وغلا مابغيتوا تطلعون!!
أبلة جوهرة(خالة عبدالرحمن):عاد تعرف أمك ماطلعت لين ماشبعت تمقل ببنت الناس!
عبدالرحمن:ها ياخالة وش رايك بس في ذوق أمي؟!
خالته جوهرة:حلو!بس للعلم البنت هذي أنا شبعانة منها ومن مقابلها!كل يوم وهي مسنترة عندنا بالإدارة!!
عبدالرحمن:أف!! لاتقولين انها ادارية بثانويتكم؟!
وش هالخيانة يمة؟!أنا قايل لك للمرة المليون أبي وحدة صغيـــــــــــــــرة!!
عاد أم عبدالرحمن تبغى ترفع ضغطه فقالت:وش لك بالبنات الصغار..خذ لك وحدة كبيرة وعاقلة!!
عاد عبدالرحمن مايحتاج!!بسرعة يزعل وبسرعة يرضى وقال: أنا قايل لك من قبل!!أبي وحدة صغيرة أشكلها على مزاجي!!
أم عبدالرحمن:ياحليلك ياولدي من صغرك وانت تحب تلعب بالصلصال!!!
خالته جوهرة:اسكت واللي يعافيك لايطق لك عرق!! أبشرك هي طالبة بثانويتنا..لااا وتدرس بثانية ثانوي!
عبدالرحمن:آآآآآآه ياقلبي!!توها رجعت فيني الروح!
بس تعالي ياخالة شلون تقولين كل يوم وهي مسنترة بالإدارة؟!!
خالته جوهرة:والله ياحبيبي بنات الحين متأثرين بأفلام المافيا مسوية لنفسها بشكة وينقال هي رئيستهم..وكل يوم مسووين مغامرات!!
عبدالرحمن:هاهاهاها..فديت روحها شكلها خفيفة ظل!!
أم عبدالرحمن: والله إني حبيتها!!صح حركاتها فيها خفة وسذاجة! بس مايخالف مع الوقت بتركد!
عبدالرحمن:بس ياخالة إذا إن البنت فيها شي غلط ولا انتي متضايقة منها في شي علمينا ترى احنا باقي على البر!!
خالته جوهرة:لا الحمدلله..المسألة كلها حركة مراهقات لاثبات الشخصية ولفت الأنظار!!
ودخلوا بعدها في وصف كل ماشاهدوه واش الاتفاق اللي تم بينهم وبين أم اسمهان..
…
*******
ننتقل بعدها للحوار اللي دار بين الجميع في بيت اسمهان..بعد ماراحوا الناس!
..
أم اسمهان:هاه يابنتي وش رايك فيهم؟!
اسمهان:الحمدلله…بس ودي لو أبلة جوهرة ماهي خالته!!!
أسماء: أكيد!! ماتنلامين! طلعت فضايحك!!
شلة الصاعقة؟!لعنبو ابليسك فشلتينا!مسوية عصابة؟! لاااا وانتي رئيستهم بعد؟!!!
اسمهان:ياربي!! وتهقين بيبطلون يخطبوني!!!
أسماء:وهذا كل اللي هامِّك؟!موب عيب بنت من عائلة لها مستواها مثل عيلتنا تسوي فرقة خالف تعرف حقتك؟!!!
لا وشوف الاسم (الصاعقة!!)تصعقون بكهرب والا بألسنتكم؟؟؟؟
اسمهان:يمة ليش ناديتيها؟!طالما هي حاشرة خشمها بالسالفة فاعرفي ان الزواجة هذي مابتتم!!!
الأم:يايمة اسماء..لسانك دايم مفلوت علينا وعلى زوجك وعلى من عرفتي ومن لم تعرفي؟!!
اسماء:أفا!!! يمة..هذا رأيك فيني؟!!
إلا دخل أبو اسمهان عليهم وكان راجع من برة وبعد السلام قال:بشروني وش صار معكم؟!!
وحكت له ام اسمهان كل مادار وصار والاتفاق اللي تم بينهم..
الجزء السادس….
ماقصروا الأب والأم وقعدوا يتتريقون على بنتهم اسمهان…وأنواع التعليقات…وأسماء لابد ماتحشر خشمها معهم!!
وماأنقذها من الموقف إلا صوت جرس التليفون!!
راحت بسرعة البرق ترد:آلو
المتصلة:أهلين!! سمهونة شلونك قلبي والله زمان عن هالصوت!!
اسمهان:هلاااااااا ابتسام حبيبتي وينك؟؟ وحشتيني…..أبشرك تراني انخطبت!!…
ولا جت أم اسمهان وسحبت السماعة من يد اسمهان بسرعة ولقيت ابتسام تقول:
إيـــــــــــــــــــش؟؟! انخبطتي؟! سلامتك حبيبتي! ومن اللي خبطك؟ أكيد أسماء! عقرب وتلدغ!!
أمهم:هلا ابتسام بنتي..عاش من سمع صوتك..شلون زوجك وبناتك؟!
ابتسام(وهي الأخت الوسطى مابين اسماء واسمهان متزوجة وساكنة ببلد ثاني وعندها بنتين توأم سارة وهيفاء):
الحمدلله يمة…بس سلامتها اسمهان مين خبطها؟
أمهم:ههههه..أختك المطفوقة ماينبل بفمها لقمة توه جانا ناس يخطبونها!!! مو يخبطونها!!
ابتسام:مبـــــــــــــــــــــ ـــــــروك…الله يوفقها..بس علميني بكل التفاصيل من طقطق لسلام عليكم!!
الأم:بعدين..المهم انتي اش اخبارك والله لك اسبوعين يالقاطعة مارفعتي علينا سماعة حتى أبوك بس يسأل عنك..وشفيك؟؟
ابتسام:يايمة ..مسرعك نسيتي؟!
أنا آخر مرة كلمتك فيها قلت لك أم زوجي بتجينا تقعد عندنا..والله وكيلك لبدت عندنا اسبوعين وكأنها قاعدة على قلبي…ماصدقت سافرت وجيت ركض أكلمكم!!!!!!!!
الأم:مالك حق تقولين هالكلام يابنتي!! هذا بيت ولدها لو قعدت شهور عندكم مافيها شي!
ابتسام:ياحليلك يمة! وانتي تحسبين كل أمهات الأزواج بطيبتك؟! هذي نسرة اسأليني عنها بس!
كل شي تتدخل فيه..لا..وفوق هذا كريهة لاتبي الناس يزورونا ولا نروح لهم!!! تصدقين أسبوعين كاملة ماشفنا فيها الشارع؟!!!
الأم:الله يعينكم..بس أهم شي يابنتي إنك قمتي بضيافتها على أكمل وجه…وقدرتيها..لاتنسين إنها أم زوجك..وقيامك بحقوق أمه يحببه فيك أكثر..
ابتسام:لاتوصين حريص!..والله إني من صباح الله خير وأنا أعجن وأخبز عشان أفطرها..خبرك فيها..عندها سكر وماتاكل من أكلنا!وليته يثمر!
إلا طايحة فيني نقد ومعاير…ومدح بحريم أولادها الثانيين!!
الأم:لما تسوين شي لأحد سويه لوجه الله…لاتنتظرين كلمة شكر من أحد!! إلا يابنتي ماودك تجينا؟!!
ابتسام:كيف؟؟ إلا بأجي ونص!! عاد زوجي يوم شافني انغثيت بجميع أنواع الغثا والحبسة من يوم ماأمه جتنا…وعدني أول ماسافرت إنه بيعوضني ويجيبني عندكم نهاية الأسبوع الجاي!
الأم:الله يبشرك بالخير……ويحييكم ان شاء الله..
