الرز البخاري
المقادير :
لحم أو دجاج ( على حسب ذوقك )
بصل مفروم خشن
طماطم معصور
بهارات صحيحة ( هيل – كمون – فلفل أسود – قرنفل – قرفة – ليمون أسود )
قليل من بهار مهران مشكل ( أبدا ماأستغني عنه في كل شي لذيذ )
ملح وزيت
صلصة طماطم
جزر مقطع شرائح طوليه رقيقة ومسلوقة في موية
بليلة – قرن فلفل اخضر
الطريقة :
حطي البصل و الزيت في قدر على النار ( إذا نص دجاجة تكفيكي بصلة وحدة متوسطة وحبتين طماطم متوسطة ).
ضيفي اللحم قبل لايشقر البصل مع البهارات الصحيحة .
قلبيهم مع بعض كويس لمدة 5-7 دقائق .
ضيفي عليهم الطماطم المعصور والملح .
وقلبيهم كويس واتركيهم لحد ماتنشف موية الطماطم .
وضيفي الصلصة وبهار مهران في حالة اذا كان دجاج , أما اذا كان لحم فضيفيهم بعد الطبخ عشان لايتغير لون اللحمة وتصير على سواد .
ضيفي موية مغليه للقدر واتركيهم لحد مايستوو .
بعد مايستوي اللحم ضيفي البهار والصلصلة و شيلي اللحم من المرقة وصفيها , رجعيها للقدر وحطيها على النار لحد ماتفور وبعدها ضيفي الرز عليها واطبخيه كأي رز عادي .
بعدما تنشف موية الرز اعملي حفرة في الرز وضيفي اللحم عليه وعلى جنب كمان وضيفي الجزر المسلوق مع البليلة وممكن اذا حابة الزبيب ضيفيه .
جمعي الرز عشان يتغطى كل شي واعملي حفرة صغيرة في النص وحطي فيها الفلفل الاخضرة بعدما تعملي فيه فتحات بالسكين عشان يطلع طعمه خطيير .
غطيه بمنشفة رطبة واتركيه على نار هادئة جدا يعني شمعة زي مايقولوا بعض الناس , حوالي ربع الى نصف ساعة .
وبعدها اغرفيه بالطريقة اللي تحبيها ..
وعوافي عـ قلوبكمـ
الرز الكابلي
المقادير :
لحم أو دجاج ( على حسب ذوقك )
بصل مفروم خشن
طماطم معصور
ثوم مفروم ناعم
ملح وزيت
بهارات الرز الكابلي ( لذيذة )
برتقال مقطع لأرباع بقشره طبعا
بطاطس مقطع
رز مسلوق بموية وملح
لون زعفران
ملح ليمون
الطريقة :
حمري البصل في الزيت ضيفي الدجاج قبل لايشقر البصل مع الثوم .
قلبيهم مع بعض كويس لمدة 5-7 دقائق .
ضيفي عليهم الطماطم المعصور والملح .
وقلبيهم كويس واتركيهم لحد ماتنشف موية الطماطم .
وضيفي الصلصة وبهارات الكابلي في حالة اذا كان دجاج , أما اذا كان لحم فضيفيهم بعد الطبخ عشان لايتغير لون اللحمة وتصير على سواد .
ضيفي البرتقال وممكن تحطي عليهم ليمون أسود حبة .
ضيفي موية مغليه للقدر واتركيهم على النار وقبل لايستوي الدجاج بربع ساعة ضيفي البطاطس .
واذا استوى كل شي شيلي الدجاج والبطاطس وخلي موية الكشنة تنشف كويس وحطي لها قليل من ملح الليمون ( على حسب ذوقك طبعا ) .
في قدر الرز شيلي شوية رز وبعدين ضيفي الكشنة على الرز وقلبيهم بشويش بملعقة خشبية .
حطي فوقهم الدجاج والبطاطس وبعدها حطي الرز الابيض الي شلتيه وغطيه كلو .
انقعي لون الزعفران بنص فنجان الشاي موية وبعدها رشيه على الرز الابيض .
غطيه بمنشفة رطبة واتركيه على نار هادئة جدا يعني شمعة زي مايقولوا بعض الناس , حوالي ربع الى نصف ساعة وبعدها اغرفيه .
وبالعافية يارب ..
الرز العربي
المقادير :
لحم أو دجاج ( على حسب ذوقك )
بهارات صحيحة ( هيل – كمون – فلفل أسود – قرنفل – قرفة – ليمون أسود )
بهارات مشكله للحم
لوز مقلي
الطريقة :
بعدما تغسلي اللحم حطيه في قدر وضيفي عليه موية والبهارات الصحيحة كلها وخليه يغلي على النار , واتركيه يستوي .
شيلي اللحم لما يستوي وصفي المرقة , ورجعيها على النار لحد ماتفور وبعدها ضيفي الرز وتكون الموية اكثر من الرز بمقياس اصبعين ..>>> ايش نسوي عاد هيك اتعلمنا ..
ذوقي الملح طيب ولالا وزيديه اذا يبغى له , وضيفي عليه الزبدة او السمن , واطبخيه كأي رز عادي .
حطي اللحم في صينية واخلطي مع الزيت بهارات مشكله وشوية لون زعفران وأنا احب أضيف لهم دقة ( عرفتوها ) وغمسي اللحم فيه وبعدها على الفرن عشان يتحمر .
حطي الرز في الصحن وبعدين اللحم ورشي عليهم لوز مقلي .
عوافي يارب
رز بالليمون ودجاج محمر بالليمون
المقادير :
دجاجة ( أنا عملت نص دجاجة )
بصل – ثوم مهروس – زنجبيل مبشور
ليمون مقطع شرايح ( 3-4 حبات )
بطاطس مقطعة أنصاف أو أرباع اذا كانت كبيرة
زيت زيتون
ملح – فلفل اسود – بابريكا – كمون
الطريقة :
ادهني الصينية بزيت الزيتون كويس ,واقطعي البصل أرباع وضيفيهم بوسط الصينية .
افركي الدجاجة بعد ماتغسليها بخليط الزيت الزيتون مع الثوم والزنجبيل وبعدين حطيها على البصل .
حطي شرايح الليمون على الدجاجة تقريبا تغطيها شوي , وباقي الشرايح حطيها في الصينية وعلى كل شريحة حطي قطعة بطاطس .
رشي البهارات والملح عليهم , وغطي الصينية بالقصدير ودخليها الفرن تقريبا ساعة .
حمري الدجاج من فوق قبل التقديم بدقايق .
الرز بالليمون
المقادير :
كوبين رز مغسول ومنقوع
4 أكواب موية
مكعب ماجي
بصله صغيرة مفرومة
ثوم مهروس – ملعقة صغيرة زنجبيل مبشور
ورقة غار – بشر نص ليمونة
ملعقة كبيرة سمن أو زبدة
ملح – عصير نص ليمونة
ملعقة كبيرة كزبرة مفرومة
الطريقة :
اغلي الموية مع الماجي وضيفي الزعفران وطفي عليه النار .
ضيفي السمن في قدر تاني وحمري فيه البصل والثوم والزنجبيل وورقة الغار .
ضيفي الرز على البصل وبشر الليمون واخلطيهم , ضيفي الموية اللي بالماجي على الرز وضيفي الملح وخليهم يغلو لحد مايتشرب الرز الموية .
ضيفي عصير الليمون والكزبرة وحركيهم , وبعدين غطيه كويس واتركيه على نار خفيفة جدا لمدة ربع ساعة .
حطي الرز في صحن التقديم .
وحطي فوقه الدجاج وصفي البطاطس وشرايح الليمون معاه والبصل وقدميه بالعافية.
رز برياني بطريقة غير
هالطريقة اخترعتها من عقلي ..
مليت من الطريقة العادية ..
المقادير :
دجاج مقطع شرايح
بصل مقطع جوانح
فلفل رومي مقطع شرايح طويلة
طماطم مقطع مكعبات
ثوم مهروس – زنجبيل مفروم
بهارات البرياني – كمون – فلفل اسود – ملح
لبن زبادي
رز مسلوق بموية وملح ومصفى
ملعقة اكل كزبرة مفرومة – وللزينة كمان
الطريقة :
حمري البصل في الزيت ضيفي الدجاج قبل لايشقر البصل مع الثوم والزنجبيل.
قلبيهم مع بعض كويس لمدة 5-7 دقائق .
ضيفي عليهم الفلفل الرومي والبهارات وبعد شوي ضيفي الطماطم .
حركيهم شوي الين يستوي الدجاج كويس وبعدين حطي اللبن .
ضيفي شوية لون زعفران وطفي النار , وضيفي عليهم الكزبرة .
تكوني مجهزة في قدر تاني الرز وعاملة زي الحفرة في الوسط وتكون عميقة شوي , صبي خلطة الدجاج فيها ( تكون نوعا ماناشفة يعني بس فيها زيت ) وغطيها بالرز اللي على الجوانب وحطي القدر على نار هادية لمدة 15 دقيقة.
اخلطي الدجاج مع الرز وحطي في صحن التقديم وقدميه مع سلطة اللبن بالخيار والنعناع .
صحة وعافية يارب
رز بالجزر والذرة
المقادير :
دجاج
بهارات صحيحة ( هيل – كمون – فلفل أسود – قرنفل – قرفة )
بهارات مشكله مهران
علبة ذرة
جزر مبشور
بصل مقطع اربع قطع – ثوم مقشر
رز منقوع نصف ساعة
الطريقة :
حطي في القدر الدجاج بعد ماتغسليه والبهارات الصحيحة وبهارات مشكلة والبصل والثوم زي ماهو وضيفي عليه موية وخليه يستوي .
بعدما يستوي الدجاج شيليه وبهري ببهاراتك المفضلة وحمريه في الفرن .
صفي مرقة الدجاج , صفي الرز من موية النقع وغسليه بعدين ضيفي عليه الجزر والذرة بعدما تشيلي الموية حقتها .
ضيفي الرز للمرقة وخليه يستوي زي اي رز وحطي عليه زيت او زبدة على كيفك وممكن تضيفي لون اصفر.
حطي الرز بعدما يستوي في صحن التقديم وحطي الدجاج فوقه وقدميه مع اللبن بالخيار والنعناع .
( أنا قدمت معاه خضار مشوحة بقليل من الزبدة طلعت زي المشوية مرررة لذيذة )
وعوافي يارب ..
واهم شي تكونون مستانسين
منقول للفائدة
يا عسل
