(هى تعمل معه فى نفس المكان من 5 سنين ولم يصادف ان التقيا الا صباح هذا اليوم )
هى جميلة ذات وجه طفولى تمشى على استحياء ناظرة للارض وهى تمر من امامه هى تعلم ان الطرقة فى الصباح مليئة بالموظفين لان الامضاء بالدور الارضى
هوينظر اليها ويسال احد اصدقائه هى مين البنت دى انا اول مرة اشوفها معقولة شغالة معانا هنا ولا من الجمهور بتقضى مصلحة ولا جاية تزور حد هنا ولا ولا ……….
صديقه : لا والله انا مشفتهاش قبل كده استنى كده يا عم لما اسالك حد نادى على زميل اخر
يا محمد يا محمد تعالى بسرعة تعرف البنت دى اللى حتركب الاسنسير
الزميل الثالث: اه اعرفها دى موظفة معانا هنا اتنقلوا من اسبوع من المبنى التانى عشان فيه تصليحات فى المبنى بتعاهم شغالة فى الدور الخامس واسمها اميرة وكمان اعرف خالها ده صديقى الروح بالروح خير يا شباب بتسالوا ليه اوعوا تكونوا بتعاكسوا مش طالبة هزار على الصبح
(اميرة بتسلم شغل فى المكتب المقابل لمكتبها )
صباح الخير يا جماعة هو بعد اذنكم الاستاذ عبد الله فين عايزة اسلمله الشغل ده
احد الزملاء : استريحى يا انسة اميرة هو ثوانى وجاى هو فى الدور الارضى واحد صحبه اتصل بيه
فى الدور الارضى
(الاستاذ عبد الله كان مع الزملاء بيسالوه عن اميرة)
الاستاذ عبد الله : صباح الخير يا ابو حميد اتصلت بيا ليه على الصبح كده خير
الاستاذ محمد : خير خير يا عبد استريح كده حنطلبلك شاى الاول ولا حاجة غير الشاى
الاستاذ عبد الله : ماشى يا عم شاى فى السريع بس خير يا عم ان شاء الله
الاستاذ محمد : ثوانى كده يا اياد يا اياد خد يابنى تعالى (بعد السلامات)
الاستاذ محمد : بصراحة كده احنا عايزين نسالك عن الانسة اميرة ايه رايك فيها
الاستاذ عبد الله : اميرة زميلاتنا تقصد اللى فى المكتب اللى قصادى ليه خير هى عملت ايه انا بعتبرها زى بنتى ……..
الاستاذ محمد : على مهلك يا عم والله خير بصراحة كده الاستاذ اياد زميلانا شاف الانسة اميرة وعايز يتقدم متتكلم يا اياد
اياد: والله يا استاذ عبد الله انا اول مشفتها عجبتنى خالص خالص واضح انها على دين ولا انت ايه رايك بس بصراحة انا متاكدتش من شكلها كويس عايزة اشوفها من قريب اظنه مش عيب ولا حرام
الاستاذ عبد الله : بص يا بنى البنت دى اخلاق واهلها ناس طييين ويابخت اللى حتكون نصيبه وان كان على انك تشوفها من قريب دى سهلة تعالى شوفها عندى فى المكتب وانا حرتبلك الامور وربنا يهيا اللى فيه الخير
اياد: ماشى يا استاذ عبد الله ربنا يخليك ايه رايك دلوقتى
الاستاذ عبد الله : ههههه على مهلك يا بنى انت مستعجل ليه دا انت خلصت اليوم فى الحكاوى دا انا يادوب الحق اخلص الشغل اللى اتكوم وانا مش قاعد خليها بكرة ان شاء الله
اياد : ههههه تحت امرك يا استاذ عبد الله بكرة بكرة وامري لله
الاستاذ عبد الله : طيب السلام عليكم
(الاستاذ عبد الله عاد لمكتبه ووجد اميرة فى انتظاره)
الاستاذ عبد الله : السلام عليكم يا جماعة ،،، ايه ده ازيك يا اميرة يا بنتى عشان كده حاسس المكتب منور اتارى القمر عندنا
اميرة: هههه(ضحكة خجولة) ازيك يا استاذ عبد الله هو فى قمر بيطلع فى النهار على العموم شكرا على المجاملة الرقيقة دى
الاستاذ عبد الله : يا بنتى انا مش بجامل انا بتكلم جد ربنا يكرمك واشوفك عروسة قريب ان شاء الله
اميرة:ربنا يخليك يا استاذ عبد الله اممم الدخلة الحلوة دى علشان تاخيرك بره المكتب حضرتك كنت حتزوغ ولا ايه دا انا ليا اكتر من نص ساعة مستنية حضرتك علشان اسلملك الشغل حضرتك كنت فين متنساش انا والمدام اصحاب
الاستاذ عبد الله: هههههه ،،، اه شغل افلام الجاسوسية ده مش حيخلينى اخلصلك الشغل
اميرة:لا لا خلاص الطيب احسن اتفضل الشغل
الاستاذ عبد الله : ماشى يا اميرة،،، بقولك هو انتى جاية الشغل بكرة
اميرة : اه ان شاء الله جاية ليه خير يا استاذ عبد الله
الاستاذ عبد الله : حقولك بكرة ان شاء الله
اميرة : ماشى ان شاء الله السلام عليكم
الاستاذ عبد الله : وعليكم السلام يا بنتى
(اياد يتناقش مع محمد بخصوص موضوع اميرة)
محمد : ايه رايك يا عم اياد مش قلتلك حجيبلك اصل الموضوع ياله يا عم عد الجمايل
اياد : يتردلك فى الافراح يا ابو حميد ده عشمى فيك برضه
محمد : بص يا اياد عبد الله ده مش بس زميل ده عشرة عمر واكتر من اخ وهو طول عمره فى حاله وعمره ما ادخل لحد فى مواضيع يعنى خلاص انت ناويها ،،،المرحلة دى مهمة فى حياة اى شاب مفيهاش هزار خلاص
اياد: عيب يا ابو حميد ان شاء الله حبيض وشك اخوك عايز يستقر خلاص
محمد: على العموم ربنا يهيا اللى فيه الخير ليك وليها
اياد:طيب ايه اللى حيحصل بكرة ان شاء الله
محمد: بص يا عم انت حتيجى مظبط نفسك برفانات وحركات الشباب دى وعبد الله حيرن عليا حنطلعله المكتب بتاعه ولا تحب تتطلع لوحدك
اياد: لا طبعا اطلع معايا الاستاذ عبد الله صحبك انت وكمان عشان تشد من ازر اخوك
محمد: ربنا يسهل الامور