قصة العقد قصة للاطفال 2024.

كان ياما كان
أيام زمااااااااااااااااان
فى بلد من بلاد أوروبا

كان فيه بنتين فى مدرسة واحدة

صديقتين

اتصاحبوا لأن كل واحدة لقت عند التانية اللى هى محرومة منه :

الأولى كانت رائعة الجمال ، لكنها شديدة الفقر

و التانية كانت غنية جدا ، لكن حظها من الجمال كان قليل

فى يوم البنت الجميلة قالت :

يا بختك .. انتى غنية .. و عندك كل ما تشتهى نفسك

فردت عليها البنت الغنية و قالت :

يا بختك انتى .. انتى جميلة .. المال ما يشتريش الجمال لكن الجمال ممكن يجلب المال

قالت الجميلة
بالعكس .. المال هو اللى بيظهر الجمال ..

تعجبت الغنية
إزاى؟

قالت الجميلة :
يعنى لو قدامك قطعتين شوكولاتة : واحدة لذيذة لكن ملفوفة فى ورقة أى كلام .. و التانية عادية لكن مغلفة بأناقة فى ورق فاخر .. هتلاقى إيدك بتتمد على الشوكولاتة المغلفة فى الورق الغالى

فقالت الغنية :
إنتى كدة أكدتى على كلامى : المال ما يشتريش الجمال .. لأن الجوهر أهم من المظهر

و مرت السنين
و كبرت البنتين
و اتجوزت كل واحدة فيهم
الغنية اتجوزت غنى و عاشت راضية

أما الجميلة اتجوزت فقير و عاشت ساخطة

كان زوج الجميلة بيحبها ، لكن هى ما كانتش بتشوف إلا فقره اللى مدارى على جمالها ..

فى يوم من الأيام جالها زوجها بيطير من الفرح
قال لها :
" رئيسى فى العمل عزمنى أنا و انتى على حفلة هيعملها فى القصر بتاعه "
فرحت الجميلة و قالت :
" يا سلام .. أخيرا هأعيش يوم زى ما بيعيش الناس الأغنية .. لكن أنا ما عنديش فستان شيك أروح به الحفلة .. مش مشكلة : أستلف فستان من صاحبتى الغنية "

و فعلا راحت لصاحبتها اللى قالت لها :
" دة دولابى .. اختارى الفستان اللى يعجبك "
فضلت الجميلة تقلب و تقيس فى الفساتين لغاية ما عجبها واحد
بصت لنفسها فى المرايا و قالت :
" بس دة فتحت الصدر بتاعته كبيرة .. و لازم له عقد "
فجاءت الغنية بعلبة كبيرة مليانة مجوهرات و قالت لصاحبتها :
" خدى اللى يعجبك "

اختارت الجميلة أفخم عقد و تصورت أن صاحبتها مش هترضى تعطيه لها
لكن صاحبتها سلفته لها بمنتهى الكرم

بالليل
لبست الجميلة الفستان و العقد
اللى زادوها جمال على جمالها
و زاد انبهار زوجها بيها
و كذلك انبهر بيها كل اللى كانوا فى الحفلة

قضت الجميلة ليلة و لا فى الأحلام
كل شئ حواليها جميل و خلاب
أول مرة تستمتع بجمالها و تعيش حياة الناس الأغنية

رجعت البيت هى و زوجها و هما سعداء و بيضحكوا و بتشكره على أجمل ليلة قضيتها فى حياتها

وقفت قدام المرايا علشان تقلع هدومها

صرخت

" فين العقد ؟ "

العقد اختفى
جريت هى و جوزها يدوروا فى كل حتة ممكن يكونوا مروا فيها لعلهم يلاقوا العقد
لكن العقد ما بنلوش أى أثر

ما نامتش هى و زوجها طول الليل
" هأقول إيه لصاحبتى ؟ "
حب زوجها ليها خلاه يفكر فى فكرة
أول ما النهار طلع راح هو و مراته الجميلة لجواهرجى ، و رسموا له شكل العقد ، و بعد ما شرحوا له حكايتهم وافق يقسط لهم تمنه على 20 سنة ..
بشرط ..
أن تعمل الجميلة خادمة عنده لضمان حقه

و بعد يومين قدرت الجميلة ترد الفستان و العقد للغنية

و اضطر الزوج يعمل فى وظيفتين بالإضافة لوظيفته
و اضطرت الجميلة تعمل خادمة عند الجواهرجى
و رغم أنه و زوجته كانوا بيعاملوها أحسن معاملة ، إلا إنها كانت بترجع آخر النهار هى و زوجها منهكين القوى

و مرت السنين بطيئة
و خلص الدين
و راحت الصحة
و راح الجمال
و فات الأوان إن الجميلة و زوجها ينجبوا أبناء

و فى يوم خرجت الجميلة و هى بتتحسر على عمرها اللى راح
راحت الجنينة اللى كانت بتلعب فيها مع صاحبتها الغنية

فجأة لقت صاحبتها ، جريت عليها و خدوا بعض بالحضن
بصت الغنية للجميلة و قالت لها :
" باين عليكى قاسيتى كتير فى حياتك "
فردت الجميلة :
" عارفة إيه اللى عمل فىّ كدة ؟ .. العقد بتاعك "
و حكت لها الحكاية
فصعقت الغنية و قالت :
" يا خبر ؟ .. لكن العقد دة كان

فلصو "