_لا شكرا اصل انا عاملة دايت
_يابنتي دي شيكولاتة وانتي بتحبيها,طيب خدي
على الاقل حتة صغيرة
_لالا بجد ميرسي مش عايزة
_طيب عشان خاطري جربي كده ,دي حتة صغيرة مش هتأثر
_بجد مش عايزة خلاص ,انا صممت اعمل دايت واخس عشان شكلي يكون حلو
واظهر قدام الناس بمظهر كويس
(ده حوار كان بين اتنين قرايبى)
بعد ما سمعته فكرت كده هو احنا ممكن نوصل للدرجة دي
اننا نمتنع عن المعاصي وبشدة عشان لما نقابل ربنا يكون شكلنا حلو
ومهما عمل الشيطان وحاول يغوينا بحلاوة طعم المعاصي
احنا برده ُنصر ونرفض ونقول لا اصل انا عامل دايت
عن المعاصي
هو ممكن نتخلى كده عن حاجة بيتهيألنا انها حلوة وطعمها تحفة
مع اننا لو فكرنا فيها شوية هنلاقيها بتسبب لنا امراض
ياترى ممكن؟؟!!
يارب ارزقنا الاصرار عن الابتعاد عن المعاصي
وارزقنا الاصرار على كلمة لا مهما الشيطان حاول يغوينا
يارب المهم اننا نبدأ مش نتكلم وخلاص
مصطفى حسنى