تعالى اقولك تهتمى بنفسك ازاى قبل العيد 2024.

حبيباتى واخواتى فى البداية احب اقولكو كل سنة وانتوا طيبن بمناسبة عيد الاضحى المبارك وعشان كده جاية ومعايا هدية العيد لكل بنوتة ومتزوجة عشان نبقى عرايس بجد فى العيد وفى الموضوع ده بإذن الله هنتكلم بالتفصيل عن كل حتة فى جسمنا وازاى نعتنى بيها ونحل مشاكلها بسهولة ومتقلقوش طبعا موضوع الاستفسارات ما زال مستمر وانا هجاوب على كل اسئلتكم ان شاء الله
المهم تبتدوا معايا فى البرنامج ده ومش عايزين كسل وكل واحدة تفاجىء جوزها فى العيد بجمالها وحلاوتها
هنبتدى يا حلوين اول حاجة بالبشرة
يالا نبدأ بسم الله
البشرة يعنى تنظيف عميق كل شهر وتنظيف اسبوعى وتنظيف يومى
هنتكلم اول حاجة عن التنظيف العميق(النيتوياج) فى البيت وبأبسط الوسائل المتاحة عندنا فى كل بيت وده طبعا يا قمامير اول حاجة هنعملها فى بشرتنا لانها بتكون كل شهر مرة
ودى الخطوات بالترتيب يالا كل واحدة شطورة تجيب ورقة وقلم وتكتب معايا عشان تبتدى تنفذ
1-فى بداية اى تنظيف للبشرة اول خطوة بتكون ازالة اى ميكب من الوجه وده عن طريق منظف الوجه(الوشن) وانا بفضل منتجات كلين اند كلير او منظف جونسون من السوبر ماركت او الصيدلية
2-تانى خطوة هتغسلى وشك بصابون طبى اى نوع عشان تعقمى بشرتك وبلاش ارجوكم الصابون العادى
3-بعد كده بتجيبى قطنة وتبليها بالحليب وتبتدى تمسحى وشك بيها بحركات دائرية من اسفل لاعلى وخلى بالكوا بلاش تقربو من العين
4-هتجيبى بعد كده قطعة قماشة او فوطة صغيرة وتبليها ماية سخنة او دافية وتعصريها كويس وتغمسيها فى بيكربونات الصوديوم وتمسحى بيها وشك كله كويس جدا حوالى دقيقتين وبعدها تشطفى وشك بماء فاتر
5-هتجيبى علبة زبادى (روب) وتفرديها على وشك وتسبيها شوية وفى الوقت ده تروحى تسخنى ماية فى حلة وتسبيها تغلى وهى بتغلى تضيفى عليها نعناع وبقدونس
6-هتمسحى الزبادى من غير ما تغسلى وشك تمسحيها بقطنة او فوطة وتغطى شعرك كويس بفوطة وتقربى وشك من بخار الماية الى انتى غلتيها وتستمتعى بالبخار 5 دقايق وطبعا تكونى مغمضة عنيكى
7-بعد كده يا قمر وشك لسا عليه بخار الماء هتجيبى شوية سكر وتفركى بيهم وشك حوالى 3 دقايق
8-وبعد كده يا سكرة انتى وهيا هتشيلى اثار السكر وتعمليلى الماسك ده بعدها على طول
(ترمس مطحون+خميرة وتعجنيهم بنقطتين ماية وتدلكى بيهم وشك 3 دقايق لحد ما ينشف وتسبيه نصف ساعة
9-بعد كده تشطفى وشك بماء فاتر وتفردى عسل نحل على وشك كله وتسبيه نصف ساعة كمان
وطبعا هتقولولى التنظيف ده ممكن ياخد مننا ساعتين
هقولكوا معلش يا حبايبى ما هو مرة كل شهر استحملوا
10-دى الخطوة الاخيرة فى النيتوياج وهى انك بتغسلى وشك بماء فاتر من العسل وبعدها تجيبى قطنة مها ماء ورد مضاف اليه عصير ليمونة وتمسحى وشك كله كويس جدا
وبعد كده يا حبيبتى تمشى ثلجة على وشك عشان تغلقى المسام تانى
وبكده هتلاقى وشك طبعا حاجة تانية واحسن ما تروحى تعملى التنظيف ده فى مراكز التجميل وتدفعى الشىء الفلانى ويحطولك جهاز بخار وكام ماسك صناعى وخلاص على كده
لكن فى بيتك اضمن واحسن لانها بمواد طبيعية وعلى الاقل هتكون بضمير
حبيباتى بكده انتهينا من الجزء الاولانى فى البشرة تابعونى لسا هكمل بقية جزء البشره

يتبع:0154: