أخر موضه للحمامات
((ارجو التثبيت))
/
/
/
/
/
طبعا الحمام من أهم وأكتر الأماكن اللي الواحد بيستعملها في البيت وبيقضي وقت فيها علشان كده لازم يكون مريح جدا وعلشان كده في الآونة الأخيرة بدأت تظهر موضات كتيرة للحمام تناسب أحجامها المختلفة والأذواق المتنوعة.
ازاي نستغل كل جزء في الحمام…؟
معظم البيوت بيكون فيها حمام واحد وفي الغالب بيكون الحمام صغير علشان كده نحاول نستخدم كل جزء فيه، أول حاجة بلاش نحط بانيو ممكن نحط فقط بانيو قدم اللي بيكون 80 في 80 ونعمل له تقفيلة ألمومنيوم، وبالنسبة للحوض نعمل دولاب عليه رخام من فوق ونسقط فيه الحوض والحيطة اللي فيها الحوض نكسيها من الأرض للسقف مرايات طبعا ده هيدينا وسع أكتر.
وطبعا هيبقى فيه التواليت محطوط في مكانه، ونحاول نخلي كل الأجهزة الكهربائية في المطبخ زي "الغسالة والسخان".
أنسب وأشيك ألوان الحمامات
بالنسبة للألوان ففي رأيي أنسب وأشيك ألوان الحمامات الصغيرة هو اللون "الأبيض" و"البيج" ودايما نعمل السيراميك اللي في الأرض زاوية 45 ونعمل السيراميك اللي في الحيطة تلتين الحيطة فقط بلاش يوصل للسقف ونعمل باقي الحيطة والسقف بنفس لون السما ده هيدي وسع للحمام.
لكن لو الحمام كبير يبقى نحط بانيو ولون السيراميك يبقى أبيض وبيج برضه أو لون غامق بحيث يدي إحساس بالدفء في المكان.
وعلى فكرة موضوع الحمامات الملونة حمام أحمر وروز دي بقى في رأيي حاجة قديمة وبطلت.
ولو عايزين نعمل في الحمام "استيلوا " اللي هو خط السيراميك اللي في الوسط يبقى يا ريت نجيب حاجة هادية وبلاش الحاجات اللي فيها ألوان كتير ونقشات كتير كل ما الحاجة تكون بسيطة تبقى أحلى.
والأحلى والأجمل إننا كل حاجة ناخدها تبقى مستوحاة من الطبيعة على سبيل المثال السيراميك يبقى على شكل حجر أو على شكل الخشب أو على شكل رخام يعني نحاول دايما نبعد عن الحاجات اللي شكلها صناعي.
وكمان لو حمامنا حمام مصيف يبقى يا ريت السيراميك يكون فيه قواقع وأسماك يعني من الآخر يكون مستوحى من جو المصيف.
عدد الحمامات بيفرق في شكلها
فيه بيوت بيكون فيها أكتر من حمام فلو البيت فيه حمامين هنعتبر حمام منهم رئيسي والتاني هيكون للضيوف..
بالنسبة للحمام الرئيسي هنعمل فيه كل الحاجات اللي قلناها في الحمام اللي فات أما بالنسبة لحمام الضيوف فده مبيكونش فيه بانيو وبيبقى فيه تواليت وحوض فقط ممكن نعمل سيراميك في الأرض وسيراميك بارتفاع 90 سم على الحيطة ونكمل باقي الحيطة ورق حائط طبعا.
ولو هتقولوا إن ورق الحيطة بيبوظ من الميه فمتخافوش لأن بما إن مفيش دش ومفيش بانيو يبقى مفيش ميه كتير وساعتها هنجيب قطعة خشبية زي كونسول أو "باهيو" ونسقط فيها الحوض وممكن نحط نجفة صغيرة قوي، ولو الميزانية تسمح نعمل الأرض والحيطة رخام.
أما بقى لو البيت فيه ثلاثة حمامات يعني معناها كده بقى إن هيبقى فيه حمام رئيسي وحمام للضيوف وحمام جوه أوضة النوم الرئيسية وده بقى لازم نعمله نفس إستايل أوضة النوم فلو الأوضة كلاسيك يبقى الحمام كلاسيك ولو الأوضة لونها موف يبقى لازم الحمام يكون موف لأن الحمام لازم يكون نفس لون الأوضة.
على فكرة بصفة عامة مش شرط إن لون الحمام يكون نفس لون الشقة ممكن يكون لون مختلف عن لون الشقة.
ولو حابين نجدد في منظر الشقة يبقى يا ريت نخلي الحمام لون والمطبخ لون تاني.
ودي تشكيلة من الحمامات
وبكده أكون خلصت كلامي عن الحمامات وموضتها وأشكالها
يارب الموضوع ينال اعجبكم ومنتظره مروركم العطر
بارك الله فيك نصائح جميلة
تشكرين عليها
وراح اثبته فترة .. عشان يستفيدوا الحلوين من حصرياتك الحلوه ^_^
على طول مبدعة