وطيت الجمر بأقدامي كفاني كل ما جاني 2024.

وطيت الجمر باقدامي كفاني كل ما جاني الكاتبه امجاد الأجوادالجزء الأول … مدخل / عندما يكبر الحُب معنا .. فنعتاد على وجوده .. ونبني على هذا الحُب احلاما ً ورديه ..لا حدود لها .. وفجئه .. يذهب ذلك الحُب .. بلمح البصر .. وبدون أي مبرات .. فحينها تكون هذه الصدمه من اقوى الصدمات .. التي قد تتلقاه في حياتك .. عائله عبدالكريم …عبدالكريم الاب نوره الامخالد الابن الكبير 27 سنه.. كان خالد طويل واكتافه عريضه بس نحيف له عوارض خفيفه مثل الاماراتين .. وسيم بشكل كبير خلود البنت الكبيره 25 سنه متزوجه وعندها ولد اسمه فيصليوسف الابن الاصغر 24 سنه.. كان طويل بعد ونحيف .. له سكسوكه معطيته جمال وعيونه الواسعه تجذب البنات لهعائله عبدالرحمن .. وهو اخو عبدالكريم عبدالرحمن : الابجواهر الام سلطان الابن الاكبر 25 سنه .. كان طويل بس مو بالحيل .. نوعا ما حلو .. شعره مطوله بحيث انه يغطي رقبته .. وناعم غدير البنت الكبيره 21 سنه غاده البنت الاصغر 10 سنواتواخر العنقود ياسر 6 سنوات عائله عبداله … اخوهم بعد عبداله الابحصه الامشعل ومشاعل توأم اعمارهم 21 سنه .. وماله كتب لهم خلفه بعد هالتوم مشعل .. كان طويل جسمه رياضي .. ابيض .. له سكسوكه خفيفه..طبعا الثلاث اخوان ساكنين بأرض وحده.. كل منهم له فيلا خاصه بعيلته ويجمعهم حوش واحد كبير طبعا ..عائله محمد… وهوجار لهم .. محمد الابمريم الاموبنتهم الوحيده امل 22 سنه……………………… …( لن ابكي .. بل سأبتسم وابارك لك هذا الزواج .. ولكن قبل كل شيء سأعترف لك .. سأعترف لك بحبي الذي عشته بمفردي على امل القاء بك في اخر المطاف .. اعلم اني تأخرت كثيراً ولكن ماذا بيدي هكذا شائت الاقدار .. عندما اخبرتني تصنعت السعاده .. وعدت بذاكرتي الى الاسابيع القليله التي مضت التي اردت ان اعترف لك فيها بحبي .. وليتني اخبرتك حتى لا اعلم بخبر خطبتك منك .. حبيبي .. اسمح لي ان اقولها لك ولأول مره في حياتي لأنها ستكون الاخيره ايضا .. احبك حبيبي .. عش حياتك معها بسعاده وحاول ان تحبها بقدر حبي لك لأن حبي لك يسع هذا الكون بأكمله .. وداعاً )خالد مصدوم من الي قراه .. اليوم كانت ملكته على بنت جيرانهم امل .. وبنفس اليوم بعد الملكه توصله هالرساله من بنت عمه غدير .. خالد قرأ الرساله مرتين ومسحها ورمى الجوال على طرف السرير وقال بستهزاء: كلام فاضي ….. وقام يبدل ثوبه لأنه متلهف يبي يكلم امل خطيبته …غدير بغرفتها وبعد مارسلت هالرساله قامت تفصخ فستانها وهي تبكي .. يعني خلاص خالد الي كانت بانيه احلامها معاه راح من بين يدينها .. وهي الي كانت تحسب انه يبيها ويحبها ومثل ماكان الكل يقول ان خالد يبي غدير بس بلحظه تهدم كل حلم يوم اتصل وبشرها بخبر خطبته لأمل وكانت الفرحه موسايعته ..انطق الباب …غدير : مين ؟!جواهر : انا يمه .. وتدخل عليها …غدير تحاول انها ماتطالع في امها عشان ماتشوف عيونها المنتفخه وتعرف انها كانت تصيح …جواهر كانت داخله تبي تسولف مع بنتها عن الملكه يعني سوالف حريم جواهر: هاه .. مابعد بدلتي ؟!غدير قدام التسريحه مدنقه راسها على انها تفك الحلق من اذنها .. : هذاني جالسه ابدلجواهر : وش رايك بالحفله اليوم .. ماشاله كامله والكامل الله .. طالعه قمر ماكأنها امل الي نعرفها غدير : ايه ماشاله شكلها مره متغير بالمكياج طالعه حلوه …جواهر : ايه ماشاله .. ياله الله يوفقهم يارب ويسعدهم .. لو شفتي خالد يوم دخلت عليه كان يبي يطير من الوناسه غدير وتحبس عبرتها .. : الله يوفقه .. ولفت تبي تروح الدولاب تاخذ لها بجامه .. وانتبهت لها امها ..جواهر : غدير يمه غدير تحوس بالدولاب بالعاني : نعم جواهر : ناظريني .. وراه وجهك صاير كذا .؟!غدير تطلع البيجامه : وش فيني مافيني شي .. عن اذنك يمه بدخل ابدل جواهر تقوم لها وتناظرها : انت تصيحين ؟!غدير : لا ماصيح .. وش الي يخليني اصيح جواهر : انا شايفه دموعك .. وعيونك منتفخه .. وش فيك يايمه غدير بكت : ولا شي .. جواهر : ادري يابنيتي بالي فيك .. كلنا ماكنا متوقعين هالشي .. بس كل شي قسمه ونصيب غدير تمسح دموعها: وش تقصدين يمه .. لا يروح بالك بعيد .. انا مابكي عشان خالد جواهر : اجل عشان وش ؟غدير ودموعها تنزل : مادري بس تصدقين يمه اني مبسوطه .. كذا احس بوناسه .. يعني الواحد موب كل يوم يفرح .. عشان كذا اصيح .. وبعدين تعرفين خالد وش كثر نحبه كلنا وخطبته وزواجه شي كبير بالنسبه للعيله .. جواهر مقتنعه ومو مقتنعه : الله يوفقهم يارب .. غدير : خلك هنا بدل وارجع لك .. وراحت ,,,,,,,,,,,,خالد يكلم امل … خالد: وش فيك مستحيه مني .. سولفي قولي شي .. امل : مادري وش اقول .. انت تكلم وانا اسمعك خالد يضحك : كل ذا خجل .. طيب ممكن تتكلمين لي عن نفسك شوي .. وش تحبين وش تكرهين .. كذا يعني ابي اعرفك اكثر امل : احب اقرأ .. اكره الروتين المستمر .. ماحب يكون وقتي وضعي نفسه مايتغير .. احب السفر .. خالد : وين تبين شهر عسلنا ؟!امل: مو كأنه بدري على تخطيط السفرهخالد : لا بالعكس .. يادوبنا نرتب .. ها وين تحبين نروح؟امل : المكان الي تحبه انت خالد : لا انت قولي وين المكان الي نفسك تروحين له … عشان نرتب وضعنا عليه ان شاله امل: ام . . انت قولي وانا اقولك ايه او لأ..خالد : شرايك برحله في الخليج امل تقاطعه .. لأ وع .. وبعدها انتبهت لنفسها .. : لا الخليج .. خلنا نطلع برا .. شرايك نروح بريطانيا .. انا رحتها مره مع ماما وبابا .. ومره حلوه خالد : ام بريطانيا .. تقولين حلوه ؟!امل : روعه خالد : اوكي افكر بالموضوع .. المهم .. تدرين يامولتي امل : ايش ؟!خالد : ان الدنيا موب سايعتني من الفرحه اليوم…,,,,,,,,,,,,,,,,,,,,ثا ني يوم الصبح غدير صاحيه ونازله من الدرج لقت سلطان يلعب مع ياسر من يطرح يد الثاني .. دخلت عليهم : السلام عليكم .. صباح الخيرسلطان : صبح صبح عمي الحج … تعالي تتحدين ؟؟غدير : والله انك رايق .. لا مابي سلطان تعالي يابنت الحلال .. مليت من كثر مافوز على اخوك الخبل هذا ياسر : والله انا الي فزت عليك سلطان : اقول هش ياله مناك .. انا بالعاني مفوزك .. انكسر خاطري عليك عشره صفر غدير: فطرتوا؟؟سلطان : لأ .. تبين تفطرينا غدير : وش تبون ؟ياسر: انا ابي اندومي سلطان : لا حول انت ماتاكل غيره .. ماتشوف شكلك صاير تشبههغدير تضحك : شلون باله يشبههسلطان : طويل وملوى ياسر زعل : مالك دخل ابي اندومي غدير سويلي غدير : اوكي .. وانت سلطان وش تبي سلطان : بيض شكشوكه ومعلبات ومعصوب وفول تقاطعه غدير وهي تقوم : هي وش كل ذا.. والله مالك غير الشكشوكه سلطان يضحك : خلاص أي شي … راحت غدير للمطبخ …رن جرس البيت رنه وحده … وانفتح الباب ودخلت مشاعل لابسه عباتها ولافه شيلتها بس.. وشافتهم بالصاله : السلام سلطان الي يحبها … ابتسم يوم شافها: هلا والله وعليكم السلام ورحمه الله مشاعل : شلونكم سلطان : تمام التمام … انت شلونك مشاعل : الحمدله بخير.. غديرصحت ولا باقيسلطان : اختي الجميله … ايه صحت وبالمطبخ تحضر لنا فطور مشاعل تروح لها المطبخ وتشوفها حايسه مع الخدامه : صباح الخير غدير لفٌت وابتسمت : هلا والله صباح النور … غريبه وش مصحيك بدري .. لا وجايتنا بعدمشاعل تبوسها : ابد والله صليت الفجر ولا نمت ويوم جات الساعه تسع قلت اكيد انك صحيتي .. وبجيك نتونس سوا غدير : هلابك .. ياله تعالي ساعدينيمشاعل تنط تجلس على دولاب المطبخ : اسفه والله .. انا جيت اسولف ماشتغل غدير تضحك : وجع ان شاله … اصلا مو محتاجتك مشاعل تضحك : ادري فيك مرا سنعه .. متى نمتي البارح ؟غدير : مانمت الا بعد الفجر .. مشاعل : غربيه وش مسهرك ؟ وقايمه بدري بعد..غدير : ولا شي بس ماجاني النوم مشاعل : النوم ماجاك ولا تفكرين بشي غدير : بوش باله بفكر … مشاعل : انتي ابخصغدير : آآآآآه بس مشاعل : سلامتك من الاه .. حاسه فيك وربي .. بس ياله كل شي نصيب غدير : تدرين وش سويت البارح بعد مارجعنا ؟مشاعل : وش؟غدير : ارسلت له رساله …مشاعل متفاجئه : رساله وش ؟؟غدير قالت لها الرساله ..مشاعل : انت مجنونه ولا وش .. ليش ترسلين له غدير : حبيت اعترف له مشاعل : بس حتى … خلاص هو ملك الحين و ما بتستفيدين شي غدير : ادري … بس بغيته يعرف مشاعل : بس وش الفايده غدير : ولا شي …بعد وقت طلعوا وجلسوا يفطرون سوا الا غدير الي مالها نفس تاكل …الا هذا عبدالرحمن وراه جواهر نازلين من فوق … يدخلون عليهم ..عبدالرحمن : ماشاله .. صاحين كلكم .. ويناظر مشاعل .. ماشاله بنت اخوي عندنا تقوم تسلم عليهم مشاعل : ازعجتكم من الصبح جواهر : عيب لاتقولين كذا سلطان : تعالوا افطروا معنا عبدالرحمن وجواهر يجلسون ويفطرون كلهم عبد الرحمن : تعالي ياغدير .. وراك وماتفطرين غدير : لا بالعافيه مالي نفس …,,,,,,,,,,,,,,,,,,,,,خالد قام من النوم واكيد مبسوط .. سحب جواله وارسل رساله لأمل( صباح الورد .. صباح يختفي بنوره انين البرد .. صباح مايعرف الصد.. صباح معطر بورود شفافه .. تشفي الهم وجراحه .. تزيل الحزن واشباحه )وقام بدل ونزل للصاله لقى امه جالسه : السلام عليكم نوره : وعليكم السلام … هلا والله بوليدي المعرس .. كيف النومه ؟خالد يحب راس امه ويجلس : احلى نومه نوره : كلمتها البارح خالد : اكيد ..نوره : الله يوفقكم ياوليدي خالد : اللهم امين …نوره : والله رجولي تاعبتني بعد امس .. ياله صحيت من النوم خالد : يعطيك العافيه يالغاليه .. الا وين ابوي طلع ؟ّنوره: ايه طلع .. يقول انه يبي يقضي كم شغله وبعدها الغدا في بيت عمك عبدالرحمن خالد تذكر رساله غدير: وشوله الغدا عندهم ؟ّنوره : بمناسبه ملكتك خالد : الله يهداهم بيت عمي ما كان له لزوم نوره : عاد مابيدنا شي … مايقصرون الا هذا يوسف ينزل من فوق توه قايم من النوم .. ويدخل : سلامخالد ونوره : وعليكم السلام ورحمه الله يجلس يوسف …نوره : ماتبون تفطرون؟!خالد : الا والله يمه … نبي احلى فطور من احلى ايدين نوره تناظر يوسف : وانت يمه يوسف ؟!يوسف بدون نفس : أي شي ( يوسف من البارح وهو مبسوط موب عشان ملكه اخوه وبس.. لا بعد لأن الطريق الي يوصله لغدير مفتوح الحين …لأنه يحبها موت ويوم صارت ملكه اخوه صفي له الجو.. اما غدير ماكانت تعتبره اكثر من اخ حتى احيانا لما تبي تفضفض وماتلقى مشاعل تكلمه .. ),,,,,,,,,,,,,,,,,,

صار الوقت الظهر .. وكل العوايل في بيت عبدالرحمن .. وبحكم انهم عيله وحده ورابين طول عمرهم سوا كانت الجلسه مختلطه .. في الصالتين المفتوحه قبال بعض الكل موجود الا غدير ومشاعل الي مابعد نزلوا من فوق …
غدير تجلس على السرير : اوف وش البس؟؟
مشاعل : البسي هذا الخليجي
غدير: لا مابي .. ابي بنطلون وبلوزه عاديه مثلك
مشاعل تحوس بدولابها الين طلعت لها بنطلون اسود واسع من فوق لتحت وجوانبه من تحت مطرزه بورد احمر … طلعته وناظرته : واو من وين مشتريته هذا
غدير : جبته من الامارات
مشاعل : خطير شكله مره حلو
غدير : يفداك والله
مشاعل : تسلمين : ياله قومي البسيه
غدير: لا مابيه .. انتي البسيه بيطلع خيال عليك .. وانا ابي البس واحد ثاني
مشاعل : لا انا لابسه خلاص
غدير : لا لا البسيه .. انا جا في بالي بنطلون ثاني .. وتقوم تفتح الدولاب الثاني …: ميشو خذي بلوزته الحمرا
مشاعل : اوكي
غدير طلعت لنفسها بنطلون بني طويل واسع بعد .. عليه بلوزه سماويه عليها ورق شجر الخريف حرير شفافه وتحتها بدي بني …
لبسو البنتين وبحكم وجود رجال ماكانوا يحطون مكياج غير كحل وقلوز شفاف …
غدير كان جسمها خيال .. طويله حوالي 165 سم … ونحيفه .. شعرها طويل لأخر ظهرها لونه بني مخصل ومقصوص شلال … وبشرتها بيضا … اما مشاعل كانت اقصر منها بشوي .. ونحيفه بعد .. وشعرها لتحت اكتافها بشوي اسود مخصل ثلجي وهالصبغه صبغوها سوا قبل ملكه خالد .. وكانت بيضا … كل منهم لبست شيله طويله تناسب لبسها ونزلوا … دخلوا للصاله ..: السلام عليكم
الكل كان يسولف وتنبهوا لدخولهم : وعليكم السلام ورحمه الله .. راحوا وسلموا على عمامهم وحريمهم وجلسوا …
غدير تحاول ان عينها ماتجي بعين خالد الي من دخلت وعينه عليها …
مشاعل : حيا الله المعرس والله
خالد يبتسم لها : الله مير يحيك ويسلمك يابنت العم
خالد يناظر غدير : غدير شلونك.؟
غدير ارتبكت يوم نادى اسمها … : بخير الحمد لله .. ودارت عيونها عنه
يوسف : شلونكم يابنات
مشاعل وغدير : تمام الحمد لله
نوره تكلم خالد : اتصل ياوليدي على اختك .. شف وراها تأخرت
خالد : طيب .. ويطلع جواله ويتصل
خلود : هلا خالد
خالد : سلام … كيفك
خلود : وعليكم السلام .. بخير .. شخبارك انت
خالد : بخير .. وراك تأخرتي منتي بجايه ؟
خلود : الا هذاني بالسياره جايه
خالد : اوكي … يقفل منها … تقول انها بالطريق
حصه : الله يهداه فصول ماريحها البارح .. كله يصيح
نوره : كلمتني باليل تقول انه مصخن مانومها
جواهر : ودته للمستشفى ؟
نوره : لا ماظن قلت لها تحط له كمادات بارده وتعطيه دوا .. وان شاله انه بيتشافى
جواهر : ان شاله ….
عبداله يكلم عبدالرحمن : وراه ماعزمتوا محمد وأهله
عبدالرحمن : والله جو على بالي بس قلت خلي الجلسه عائليه نكون كلنا على وجه واحد
خالد : الله يهداك ياعمي صاروا من العيله الحين …
عبدالرحمن يضحك : ايه وانت الصادق ..
مشعل : بس خالد مايبي عمي محمد … يغمز له
خالد ضحك .. وغدير ولعت من داخلها ..
حصه : والله وعرفت تختار ياخالد بنت ماشاله ماعليها كلام
خالد : الله يسلمك
جواهر : ايه والله ماشاله عليها طالعه قمر البارح
نوره : هذي مرت الغالي اكيد بتكون قمر
حصه : الله يوفقهم ان شاله ونشوف عيالهم
مشاعل : خالد كلمتها ولا باقي
خالد : ايه كلمتها
مشاعل تضحك : ايه وش قلتوا؟
مشعل : وانت وش دخلك الحين وش قالو وش ماقالو
مشاعل تضحك : ابي اعرف… قطع كلامهم قومه غدير .. تبي تتطلع من الصاله .. وقفها صوت امها
جواهر : وين رايحه غدير
غدير : ها .. بطلع غرفتي
خالد حس فيها ..
جواهر : ان زين مري على المطبخ شوفي الوضع
غدير : ان شاله .. وراحت .. ولحقتها مشاعل
مشاعل : وش فيك ؟!
غدير: ماتحمل اجلس اكثر…
مشاعل سكت وراحت معها ..
بعد شوي رن الجرس ودخلت خلود : السلام عليكم وتسلم عليهم كلهم وتجلس : ماشاله الكل مجتمع
عبدالكريم : ايه … ويناظر فيصل الي ساحب تنوره امه ..
فصول تعالي عندي ياجدي ..
فيصل موب راضي يتحرك ..
نوره : تعال يمه …
حصه : شلون حرارته انخفضت ؟!
خلود : لا الحمدله سويت له كمادات وعطيته فيفادول وصار احسن ..
عبداله : وين رجلك ؟!
خلود : نزلني وراح يقول انه مشغول
قامت حصه للمطبخ تبيهم يحطون سفر الغدا …
صار الغدا بالارض وغدير ومشاعل فوق بالغرفه …
حصه : قومي يايمه ياغاده نادي على غدير ومشاعل
غاده تقوم : طيب .. وتطلع لهم وتقولهم وتنزل ..
مشاعل : ياله قومي
غدير : مابي مالي نفس
مشاعل : غدير مايصير كذا .. الحين الكل بيسأل قومي حتى لو ماتبين تاكلين بس اجلسي شوي معنا
غدير: مابي خلاص انت انزلي ولا خلصتي تعالي عندي
مشاعل : لا بتقومين غصب عليك .. ياله .. وتسحبها .. وينزلون .. الكل كان جالس وياكلون الا غدير الي تتغصب القمه تغصب .. غدير مدت ايدها بتحط في صحنها سلطه .. وبالصدفه خالد يمد ايده على نفس الصحن .. تصاقعت ملاعقهم بعض .. سحبت غدير ايدها وبعد خالد .. وصاروا يناظرون بعض .. محد منتبه غير يوسف ..
خالد : مدي الصحن احط لك
غدير : لا شكرا .. انا باكل من هذا .. وتقصد صنف ثاني .. وتمد الصحن ليوسف : لو سمحت حط لي من الي قدامك
يوسف ياخذ الصحن ويحط لها ويعطيها ..
غدير : شكرا
يوسف : العفوا .. حنا بالخدمه .. كم غدو عندنا بالعيله
غدير ضحكت : تسلم
يوسف : الله يسلمك .. تعالي كل يوم
غدير مات ضحك من يوسف .. وخالد يطالعهم
يوسف ناظره : وش عندك يالاخو .. تبي خدمه شي
خالد : لا
يوسف : لا تستحي عادي .. وش تبي ؟!
خالد : يوسفوه ريحنا
يوسف يضحك : ماش اخلاقك تجاريه
سلطان : وش فيكم
يوسف : لا ابد سلامتك .. بس المعرس مستحي ياكل
مشاعل : افا ليش بس
سلطان : الحين مابيعجبه الاكل معنا .. ان ماكانت الحرمه يمه مابياكل
خالد يناظر فوق : الحمدله والشكر
مشعل متابعهم من اول : يحق له ياسليطين .. انا لا خطبت بغث اهل مرتي كل وجبه بكون عندهم
مشاعل : وبعد شهر تقولك ابي الطلاق غثيتني
مشعل / تخسى الا هي ..
سلطان : اوف ياشديد
رن جوال خالد وكانت امل …
خالد : هلا والله .. تمام الحمد لله انتي كيفك .. لا انا جالس اتغدا الحين في بيت عمي بس اخلص اتصل عليك .. اوكي .. انتبهي لنفسك .. مع السلامه
غدير قامت : الحمد لله
يوسف : تعالي وين ماتغديتي ..
غدير : لا الحمدله شبعت انتو كلو بالعافيه
يوسف : صحنك مثل ماهو .. كذا مايصير المره الجايه مابقولك تعالي كل يوم
غدير ابتسمت : والله شبعت .. وتروح للصاله .. شوي الا جاها فيصل
غدير تضحك له : فصول ..
فيصل يضحك ويروح لها .. تشيله على حجرها وتحبه : كيف حالك
فيصل : طيب
غدير : شفت خالوا امس عريس
فيصل يهز راسه بمعني ايه
تسحب ايده وتفتحها : شرايك نلعب ؟
فيصل : ايه
وتلعبه بأصابعه : صغير وعاقل .. لباس الخواتم .. كبير ومجنون.. غسال الصحون .. وين بيتك يانمله .. وين بيتك يانمله .. وتاكل ايده وهو يصارخ ويضحك …

,,,,,,,,,,,,,,,,

بعد العصر كانت غدير ومشاعل بالحوش معهم سلطان ويوسف ومشعل .. وكانوا يلعبون حكم شيبه .. انتهى العب وجا الحكم من يوسف لمشاعل ..
يوسف : ام .. احكم احكم عليك
مشاعل تقاطعه وهي تضحك : امانه مايكون صعب
يوسف : موب شغلك انا احد
مشاعل تضحك : الله يستر
غدير : الله يعينك
مشاعل: مشعل تكفى خذ الحكم عني احس انه نذل
مشعل : لا والله .. تحملي الي يجيك
يوسف: قومي لفي الحوش 10 مرات ركض بدوم ماتوقفين ولا مره
مشاعل : لا حرام عليك
يوسف : نفذي ولا تطلعين من العبه
سلطان : وش هالحكم بيذن المغرب وهي باقي تركض
يوسف : اجل نخليها خمس مرات
مشاعل تقوم : طيب .. بس لا تكملون العبه الين اخلص الرياضه .. الله يقلعك يايوسف
يوسف : لا تسبين ولا برجعه مثل اول بدون تخفيضات
مشاعل تضحك : لا لا خلاص … تناظر غدير : قومي معي
غدير : ايام سو سوري اسفه .. خلصي وتعالي
سلطان : انا بقوم معك
غدير : ياله …
ويروحون يلفون الحوش ركض ويرجعون وهم تعبانين
سلطان : وجع يايوسف
مشعل : انت الي تبرعت
ويبدون العب مره ثانيه …

,,,,,,,,,,,,,,,,,,,,,,,

بعد ايام ..
غدير بالصاله ومعها سلطان وغاده …
قام سلطان : انا طالع
غدير: مع السلامه
وطلع .. بالحوش على جيه مشاعل … شافها سلطان : اهلين
مشاعل : هلابك .. غدو موجوده داخل
سلطان : نفسي يوم تجين تسألين عني
مشاعل : وش ابي فيك اسأل عنك
سلطان : افا .. كل ذا كره
مشاعل : لا موب كره .. بس مالي حاجه فيك
سلطان : والله ماتدرين عن الدنيا يمكن بكره تصير حاجتك بيديني
مشاعل تضحك بستهزاء : حتى لو صارت بيدك متنازله عنها
سلطان : مشاعلوه بذبحك ترا
مشاعل : خير ان شاله .. ليش وش مسويه لك ذابحه امك ولا ابوك
سلطان : ذابحتني
مشاعل : اقول وخر مناك ياله .. موب فاضيه لمزحك الحين وتروح داخل
سلطان ضحك وطلع ..
مشاعل : سلام
غدير : اهلين وعليكم السلام
غاده : وعليكم السلام
مشاعل ترمي نفسها على الكنب : اخباركم
غدير : الحمدله .. انتو كيفكم
مشاعل : ماشي الحال ..
غدير: انت وش جايبك الحين
مشاعل استغربت : ليش؟1
غدير : انا مليت من بيتنا وقلت بجيك
مشاعل : طيب ياله قومي
غدير : ياله .. وتكلم غاده .. لو امي سألت قوليلها في بيت عمي
غاده : طيب
وتروح غدير تلبس شيلتها وتروح مع مشاعل لبيتهم ..
جالسين بالغرفه ويرن جوال مشاعل .. تناظره : هذي امل
غدير وبعد ملكه خالد عليها صارت ماتحبها … : وش تبي ؟!
مشاعل : مدري .. وترد عليها : هلا والله اموله
امل : السلام عليكم
مشاعل وعليكم السلام هلا والله
امل : كيفك ياحلوه
مشاعل : تمام الحمدله .. كيف عروستنا
امل تبتسم : بخير الحمدله .. اقول مشاعل انت بالبيت ؟!
مشاعل : ايه والله وعندي غدير
امل : زين .. اقدر اجي لمكم
مشاعل تناظر غدير : حياك .. البيت بيتك وبيت اهلك وتضحك
امل : تسلمين : ياله بعد المغرب ان شاله اوكي
مشاعل : اوكي نتظرك ..وتقفل منها …
غدير : بتجي صح ؟!
مشاعل : ايه
غدير : متى
مشاعل : بعد المغرب
غدير : اجل انا بروح بيتنا
مشاعل : ليش ؟!
غدير: مابي اجلس معاها ..
مشاعل : غدير وش فيك انت .. وش التفكير الطفولي هذا .. متى بتكبرين مخك
غدير: انا كذا تفكيري عندك مانع .. وتقوم تبي تتطلع من الغرفه
تقوم معها مشاعل وتوقفها : غدير تعالي لا تروحين .. خلينا نتكلم شوي
غدير: وش تبين تقولين
مشاعل: والله مايصير الي تسوينه بنفسك .. خلاص خلي الوضع عادي بالنسبه لك .. لا تفكرين بأمور تتعبك ..
تقاطعها غدير بأنفعال : مو بيدي وش تبين مني اسوي .. انا احبه ومو سهله لما اشوف الي يحبها معنا .. انا ماحبها ماحبها .. هي الي اخذته مني .. وصارت تبكي
مشاعل تضمها : ياحبيبتي .. هذا نصيب مابيدنا شي
غدير تبكي على كتفها : وذاك اليوم يكلمها قدامنا .. ليش مايطلع يكلمها برا .. لا ويقولها انتبهي على نفسك
مشاعل: هذي مرته الحين .. ولا يحتاج يطلع بعيد عشان يكلمها ومن ابسط حقوقه انه يقولها تنتبه على نفسها
تمسكها مشاعل وتجلسها على الكرسي .. خلاص ياقلبي اسكتي .. لازم تتعودين .. وبعدين موب كل شي يبيه الانسان يصير .. خليه يولي وانت عيشي حياتك .. وليش تفكرين بواحد مايفكر فيك بالاصل ..
غدير تمسح دموعها : صادقه .. ليش اتعب نفسي على الفاضي .. خلاص انا لازم انساه
مشاعل ابتسمت : ايه هذي غدير الي اعرفها .. والحين مافي روحه سامعه
غدير : ايه مابروح
بعد المغرب .. وصلت لهم امل .. وجالسين بالصالون ..
مشاعل : ايوه واخبارك بعد
امل : تمام الحمدله .. وتناظر غدير .. غدو كيفك انت
غدير: الحمدله .. انت كيفك .. كيف احساس العرايس قوليلنا
امل تضحك ومستحيه : حلو .. ان شاله بتجربونه
مشاعل : ان شاله .. ياله علمينا وش تقولون خلينا ناخذ كورسات
امل تضحك : وش اعلمكم ..
غدير تبي تعرف وش الي يدور بينهم : كل شي
امل : عادي مافي شي مميز .. كلام عادي بس
مشاعل : احبك وحشتيني حبيبتي .. تصبحين على خير وهالحركات صح ؟1
امل تبتسم : يعني تقريبا
غدير: كيف اول مكالمه ؟!
امل : اول مكالمه قالي انه اسعد انسان بالدنيا
غدير حست النار تغلي بقلبها ..وقامت بسرعه
امل استغربت ومشاعل لحقتها : وش فيك ..رجعنا
غدير: خلاص برجع البيت .. مع السلامه وتلبس وتطلع .. وترجع مشاعل لأمل وهي منحرجه
امل: وش فيها ؟!
مشاعل: والله مدري عنها .. بس تقول انها نست امها قالت لها ترجع عشان بيطلعون
امل : اها
مشاعل : ايوه كملي …

,,,,,,,,,,,,,,,,,,,,,,,,,

سلطان بالصاله يسولف مع ابوه …: شلون العزيمه يبه
عبدالرحمن : زينه .. عازم كثير والله .. ناس لنا سنين ماشفناهم
سلطان : ماشاله .. يبه شلون تعرفونه .. وش اساس معرفتكم
عبدالرحمن : هذا ابوه يصير خوي جدك الله يرحمه .. كانت صداقتهم قويه الله يرحمهم
سلطان : اها .. الله يرحمهم
غدير نازله من غرفتها : السلام عليكم
ابوها واخوها: وعليكم السلام ورحمه الله
جلست .. والكل ساكت ..
غديرتكلم سلطان : سأل عنك يوسف اليوم .. ماتقابلتوا اليوم
سلطان : لا والله .. بس ماقال لك وش يبي
غدير: لأ ..
عبدالرحمن يقلب بالقنوات ومر على كم قناه غنائيه وفيها بنات يرقصون ..: الله يقلعهم على هالقنوات .. ذول الحريم مافي احد يلمهم
غدير ابتسمت على كلام ابوها .. وقال سلطان : شغلهم يايبه
عبدالرحمن : أي شغل الي كذا ..
سلطان : شف كم يحصلون من ورا هالرقص
عبدالرحمن : والله اعيش على الفقر ولا شغله مثل هذي تخليني غني ..
وضلوا يسولفون …

,,,,,,,,,,,,,,,,,,,

مر اسبوع والاوضاع مثل ماهي .. والروتين نفسه نفسه .. وامل ماتصلت على خالد ولا خالد اتصل عليها … وبنفس اليوم في اليل امل قرت انها تتصل عليه .. بس قبل اتصالها ارسلت رساله (حبيبي انا اسفه .. صدقني اشتقت لك موت ) واتصلت بس خالد مارد لأنه ماكان عند الجوال .. امل انقهرت ليش انه مارد عليها تحسب انه متعمد هالحركه.. ولارجعت اتصلت بعدها .. خالد طلع من دوره المياه وراح انسدح على سريره وسحب جواله بيوقت الساعه على سبع عشان وراه مشوار ضروري الصبح .. شاف رساله واتصال من امل ورد اتصل عليها … امل شايفه اتصاله ومترده ترد ولا لأ وبالحظه الاخيره فتحت الخط وكل واحد منهم يتكلم مع الثاني بجمود
امل: الو
خالد : السلام عليكم ..
امل : وعليكم السلام ..
خالد : اتصلتي علي ..؟!
امل : ايه ..
خالد : وش بغيتي ؟!
امل : وش بغيت … ابد سلامتك .. بس كنت بسأل عنك ..لأنك وحشتني
خالد : اها .. تقولين اني وحشتك ؟!
امل : ايه
خالد : وليش اوحشك .. بصفتي منو ؟1
امل : شلون ليش .. وبصفتك منو .. خالد انا ادري انك زعلان على الي صار بينا وانا اسفه
خالد : وتعتقدين هالحركه بسيطه وبقبل اسفك بهالسهوله .. قفلت الخط بوجهي كبيره بحقي
امل :طيب انا اسفه والله اسفه.. وشلون تبي اعتذر لك
خالد : والله مادري .. انت وشطارتك .. والحين تبين شي .. ابي انام وراي قومه بدري الصبح
امل : وش عندك ؟!
خالد : عندي شغل
امل : الساعه كم ؟!
خالد : سبع
امل : طيب مسامحني ولا لأ؟
خالد : لأ ..
امل : خلود حبيبي .. خلاص عاد والله انا اسفه .
خالد : قلت لك الاسف هذا ماعتبره شي عند حركتك
امل تنهدت : اوكي .. تصبح على خير
خالد ..قفل الخط بوجهها يبي يحسها بحقاره الحركه الي سوتها معه ونام .. اما امل طولت سهرانه ميب عارفه وش الطريقه الي تراضي فيها خالد .. ضلت تفكر وتفكر الين غلبها النوم ونامت …

,,,,,,,,,,,,,,

اما غدير فكانت بغرفتها جالسه على النت والمنتديات .. تنزلت كتاباتها كالعاده وتشوف ردود واراء الي يتابعونها … بهالحظه توصلها رساله من رقم يوسف ( وش تسوين ؟!) .. استغربت غدير الرساله وضحكت وارسلت له ( وش دخلك ؟!) يوسف قرا الرساله وكان متوقع هالرد منها لأنه يعرف اسلوبها زين ويعرف وشلون يتعامل معاها ..فأرسل لها ( دخلني الي دخلك ..اقول اخلصي فاضيه ولا مشغوله ؟!) ردت عليه( ههههههه .. انا على النت الحين وش تبي )
ارسل لها ( اوكي انا بفتح الحين النت .. واشوفك على الماسن اوكي )
ارسلت له( ايميلي خربان ولا ادري وش فيه ..قول وش تبي اخلص )
ارسل لها ( مخنوق انا حيل واحس الخنقه هدتني .. مكسور قلبي وروحي مدري وش بلاها )
غدير قرأت الرساله وتفاجئت .. وردت عليه بسرعه ( خير وش السالفه )
ارسل لها يوسف ( هههههههههههههههههههههههههههه .. مافيني شي اضحك عليك)
غدير انقهرت منه وطنشته … يوسف انتظر رساله منها بس مارسلت واتصل عليها .. تشوف اتصالاته وتعطيه مشغول … الين ردت : نعم
يوسف وصوته فيه الضحكه : زعلتي
غدير : لا مازعلت بس صدق انك انسان مليق ..
يوسف يضحك من كل قلبه .. ويوم انتبه لسكوت غدير سكت : طيب اناسف
غدير: وش تبي متصل بأخر اليل ؟!
يوسف : ولا شي بغيت اسولف معك
غدير: والله انك فاضي .. ياله مع السلامه
يوسف : ليش بتقفلين ؟!
غدير: مشغوله
يوسف : طيب سولفي معاي شوي وبعدين كملي شغلك
غدير: لا والله شرايك اجي عندك الحين ونجلس نسهر سوا بعد .. والله هذا الي ناقص
يوسف ابتسم : طيب ياله انقلعي .. الشرهه علي انا اصلا الي مخليلك اعتبار .. كان اتصلت على وحده من خوياتي احسن منك ..
غدير: كان اتصلت عليهم طيب ..
يوسف ماتوقع هالرد منها : يعني عادي عندك لو اكلم بنت
غدير: ايه عادي كل الشباب كذا .. ولا بتسوي روحك الملاك الي مايغلط
يوسف : طيب … ياله تبين شي الحين
غدير: لا شكرا ..
وقفل منها … يوسف محتار شلون يبي يبين حبه لبنت عمه .. وغدير ماتشوفه اكثر من اخو .. هو يستانس يوم يشوف اسلوبها العفوي معه .. وبنفس الوقت عارف انه لو بين حبه لها بتغير عليه بالحيل ..

,,,,,,,,,,,,,,,,,,,

ثاني يوم خالد خلص شغله وراح لمكتبه على الساعه عشره الصبح … دخل المكتب الي بالشركه حقت ابوه وعمامه ولقى على الطاوله باقه ورد كبيره وفي ورود من كل الانواع تقريبها .. ومغلفه بطريقه حلوه وطالع شكلها روعه .. راح لها ورفعها ناظرها وابتسم .. لقى داخلها كرت سحبه وقراه ( غلطت بحقك واعترف .. وهذا اعتذاري اقبله … حبيبتك امل ) .. على طول سحب جواله واتصل عليها .. وردت عليه امل وكانت عارفه انه شاف الهديه ..
امل : هلا والله
خالد : وش هالمفاجئه الحلوه .. ماشاله عليك مسرع ارسلتيها
امل : لعيونك كل شي يصير .. المهم الحين .. انا اسفه ياقلبي ..
خالد : اسفك مقبول .. بس لا يتكر سامعتني