دلوقتى هكتب لكم مكونات الماسك وطريقته ويلا ركزوا معايا
3 ملاعق كبيرة نبات بذرة القاطونة
قطرات قليلة من زيت اللوز المر ( انتبهوا زيت اللوز المر غير الحلو )
وزى ما قلت انه بذرة القاطونة دي هتلاقوها انشاءالله متوفرة عند أى عطار وهتلاقوا شكلها بالظبط بالظبط عاملة زى حبوب السمسم بس لونها بيدي على بنى كدة
وزيت اللوز المر الى بستعمله وهو انتاج شركة مصرية وهو فعلا حلو أوى النوع دة لدرجة انك بتشمي ريحة اللوز من الزجاجة وسعره رخيييص موووت
الطريقة : ركزوا بقي معايا أول حاجة هنحط البذور فى الهون وندقهم كذا دقة كدة يعنى مش هنطحنهم ناعم ولا نسيبهم خشن يعنى ندقهم كذا مرة كدة وخلاص وانتبهوا الدق يكون فى الهون لكن مش مطلوب خالص تطحن فى المطحنة خدوا بالكم وبعدين نبدأ نضيف ليهم ميه شوية بشوية بس مش نغرقهم خالص ونبدأ نقلب لمدة ثوانى وهنلاقي انه البذور بدات تتماسك فى بعضها وبقت زى الجيلاتين كدة وبقت لزجة ساعتها نبطل نزود مية ونبطل تقليب لأن انتبهوا ممكن لو زودنا الميه والتقليب هنلاقيه لزق فى بعضه خااالص وبقي زى السويت وهيبقي صعب يتفرد على الوش عشان كدة نوقف المية والتقليب أول اما نحس انه بدأ يلزق فى بعضه وبقي متماسك شوية وينفع يتفرد على البشرة
بعد كدة هنضيف قطرات قليلة جدااا من زيت اللوز المر ونبدأ نقلبهم بصوابعنا على عجينة البذور
تحضير البشرة قبل الماسك : لازم قبلها ننضف وشنا كويس وانا عن نفسي بنضف وشي باللبن زى ما أنا متعودة
وبعدها نغسل وشنا بالميه بس وننشفه كويس تمام لغاية كدة ؟؟!!
ونبدأ نوزع الماسك على وشنا وعلى الرقبة ما عدااااااا منطقة تحت العين خدوا بالكم لانه مينفعش نحط ماسك تقشير فى المنطقة الرقيقة الى تحت العين لانه هيبقي قوي عليها وعشان كدة هنكتفي بس بوضع طبقة رقيقة من زيت اللوز المر لوحده ونسيب الماسك لمدة من 3 الى 4 ساعات ومعلش المدة طويلة شوية بس زى ما قلت لكم الماسك دة ليه مفعول التقشير الكيماوى ولازم ياخد وقته على البشرة عشان كدة ممكن نحطه فى يوم الأجازة أو بليل فى الوقت الى فاضيين فيه ونسيبه على وشنا وننساه ونعمل اى حاجة وهنلاقي الوقت عدى بسرعة وبعد كدة نغسل وشنا بماء فاتر وبعدين ماء مثلج عشان نقفل المسام ونمسح وشنا بقطنة فيها ماء ورد أو اى تونيك عندك ومتعودة عليه …. وشوفي بقي وشك بعدها وهتلاحظى الفرق من أول مرة واعملي الماسك مرتين فى الاسبوع عشان تحلي كل مشاكل وشك وهو آآمن فى الاستعمال وطبيعي ملحوظة: بصراحة الماسك دة اما بيتحط على الوش بيبقي شكله مرعب شوية وانا بصراحة اما حطيته أخويا استلمنى تريأة انتوا عارفين بقي الصبيان وغلاستهم بس انا مهمنيش برده وفضلت قاعدة لهم فى البيت بشكلي المرعب عشان كدة بنصح غير الجريئات وخصوصا المتزوجات طبعا انهم يعملوا الماسك دة من غير ما حد يشوفهم وخليهم بس ينبهروا بالنتيجة بعدها