الموضوع اللى هكتبه ده يمكن كلنا عارفينه من زمان ولكن الجديد فيه إنه مش كلام الواحد حفظه وبيردده لا يا حلوين أنا مش هقعد على الكمبيوتر كده عشان سعتك تقرأى الموضوع وتقولى فى النهايه آه والله البت دى عندها حق خلى بالك مش هنولهالك أبدا دى لازم نتفق عليها من الأول إن لازم يكون فى تفاعل و من أول موضوع هعرف علطول ومش بس كده لا دا كل واحده هتدخل من البنات ولا الأمهات هتوعدنى إنها هتفكر فى الموضوع وتبدأ تنفذه معانا متفقين ياجماعه من أولها ومش عاوزين مشاركه سلبيه يعنى (موفقه حبوبه أو مشكوره ياعسل) كان غيركم أشطر !!!!!!!!!
ياجماعه انا بعمل كده ليه عشان بجد بجد عاوزين نتغير ولا إنتو عاجبكو حال البنات اليومين دول إحنا عاوزين كل واحده تدخل الموضوع تكون نيتها خالصه لوجه الله وعندها إستعداد تتغير وإحنا معاكى يا أختى أو بنتى متخافيش إحنا الأمهات هناخد بإيدك إن شاء الله لبر الأمان وممكن ننسى بأه شويه خشونه الشعر وخشونه الرجل وخلطة التبييض ونلتفت للأهم !!!!!!!!
على فكره أنا هزعل لو ملقتش ردود بتوعد انا عارفه انكم هتقولوا ما تزعل ولا تتفلق لأ يا جماعه كل واحده فينا لها دور فى حل مشاكل أمتها وإحنا بنجتهد والباقى على ربنا وربنا يجعله فى ميزان حسناتنا إن شاء الله قولوا آميين هنبتدى من أولها سمعينى صوتك إدينى أكتر !!!!!!!!
بسم الله الرحمن الرحيم والصلاة والسلام على أشرف المرسلين سيدنا محمد صلى الله عليه وسلم وعلى آله وأصحابه أجمعين .
هنتكلم اليوم يا أخواتى عن كيفيه إختيار الزوج ولكن سوف نضع فى الحسبان البيئه التى تربت بها الإبنه لأن لها عظيم الأثر فى إختيار الزوج . وتتعدد البيئات التى تتواجد فيها الإبنه فمنها على سبيل المثال لا الحصر :-
1- بيئه منغلقه على نفسها أى أن الأب عايش دور سى السيد وهذه البيئه التى تتواجد فيها الإبنه تجعلها ليس لها الحق فى إختيار شريك الحياه لإن من وجهة نظر الأب أو الأم أن هذا حق مطلق لهم فقط وليس للبنات أى رأى لأنهم لا يعرفون مصلحتهم .
وتعليقى على هذا للأم وأهمس فى أذنك وأقول لك أكم من المشاكل الزوجيه تحدث بسبب تسلط وجبروت الأب فيجب أيتها الأم أن يكون لك دور فى ذلك وهذا الدور يبدأ من كيفية إختيارك لزوج المستقبل .اما وإن وقع المحذور فحاولى بشتى الطرق مع زوجك وإقنعيه أن هذا ليس فى مصلحة إبنته وهذا الضغط سوف يسبب لها الكثير من المشاكل وخاصة فى العصر الذى نعيش فيه عصر الفتن والشهوات !
2- بيئه منفتحه أكثر من اللازم وعندها الحريه شئ مقدس ومش مشكله أى حاجه تانيه من عادات وتقاليد المهم فى وجهه نظر هذه الفئه إنها تكون ستايل ومش متخلفه ولا رجعيه وعلى فكره البنات اللى من هذه البيئه هما اللى أول ناس بيقعوا ولا حول ولا قوة إلا بالله .
فلابد أن نكون وسطا لا بين هذا ولا ذاك ولتتذكرى عزيزتى الأم أنك مسائله أمام الله عن تربيتك لإبنتك والتى ستؤهلها للإختيار الصحيح بإذن الله ولتعلمى والكلام للبنات إن فتى الأحلام من وجهة نظرك لابد أن يكون ملتزما دينيا وأخلاقيا لإنه إذا كان ملتزما سوف ينعكس ذلك عليك وعلى أبنائك بعد ذلك ونصيحتى لكل بنت أن تتقى الله فى نفسها والا تسلم قلبها لأحد بدعوه الإختبار يعنى إنك تختبريه أنا عاوزاكى تسألى نفسك ياحبيبتى هل فى حاجه فى ديننا إسمها إختبار الزوج قبل الزواج .
إحنا إتفقنا من الأول أنه لابد من التغيير ولكن فى إطار ديننا الحنيف طب لو كلامى مش عجبك هخلينى معاكى واحده واحده هل فكرت يوما وانت ماشيه مع زوج المستقبل إن الأرض اللى إنتى ماشيه عليها ممكن تنشق وتبلعك قصدى اللى بيسموه هبوط أرضى .ساعتها ياحلوه هتقولى إيه لربنا أقصد هل فكرت فى خاتمتك فى أخرتك فى عقاب ربنا ليكى بلاش كده هل فكرت فى الذريه التى ستنجبيها من مثل هذا الرجل وهل ستكون ذريه صالحه أم لا .
لا يا أختى يجب أن يكون تفكيرك أكبر من هذا ولتعلمى أن إختيارك الصحيح لزوج المستقبل سوف يترتب عليه أشياء كثيره وأولها أولاد صالحين نافعين لأنفسهم أولا ثم مجتمعهم وأن قصص الحب التى تشاهديها بالتلفاز ما هى إلا من نسج الخيال ولا تمت للواقع بأى صله .يالا ياحبيبتى نتعاهد على إنك إن شاء الله سوف تغيرى من أسلوب حياتك إذا كنت من هواة القصص وتذكرى جيدا أن الله يراقبك أينما كنت وليكن هدفك بالحياه أكبر من متش كوره ومن أغنيه تسمعيها
تعالى يا أختى فى الله (الأم والأبنه) نضع معا النقاط الأساسيه التى يجب أن تتوافر فى زوج المستقبل والتى يجب أن تضعيها فى الإعتبار عند إختيارك لزوج إبنتك .
1- الإلتزام الدينى . وهذا يتضح جليا من معاملته لكى أيتها الإبنه الكريمه ومدى حرصه عليكى وطبعا زى ما إتفقنا لو عاوزه سعاده زوجية وبيت سعيد لازم تبتدى صح من الأول يعنى مفيش خلوه – مفيش كلام فى التليفونات من ورا ماما وبابا لإن إحنا بنقول تكوين أسره يعنى لابد يكون الأساس متين حتى يتحمل شدة الرياح والعواصف .يعنى على أساس دينى بحت ولا أقصد تعصبا دينيا إطلاقا ولكن أقصد الإلتزام بتعاليم الإسلام فى كل خطوه يا إبنتى العزيزه لكى لا نبكى على اللبن المسكوب .
2-المستوى الإجتماعى :- والمقصود به المادى والثقافى أى لابد وأن يكون هناك تقارب من ناحية مستوى العائله وأيضا من الناحيه التعليميه .
3- المستوى الفكرى :- المقصود به تقارب الأفكار بين الشريكين من حيث الموضوعات التى تثار والأراء التى تتخذ فيها وأيضا الهوايات ودا شئ مهم جدا لإن ممكن أحد الزوجين يكون لديه هوايه معينه والطرف الآخر يقلل منها على إعتبار أنها شئ تافه وهنا تحدث فجوه بين الزوجين على المدى البعيد فلابد أن تكونى واعيه يا إبنتى لمثل هذه الأشياء لأنها بتكبر مع الزمن .
4- الإرتباط الأسرى :- مدى إرتباط عائله الزوج بعضها ببعض لأن ذلك سوف يكشف لك أشياء عن زوج المستقبل وتعرفى إذا كان كلامه معاكى تمثيل ولا حقيقه أقولك إزاى يعنى لو رب الأسره عندهم متسلط ولا يسمع لرأى زوجته يبأه تأكدى أن الإبن مثل والده تماما وأنه بيجاملك فقط لكى يأخذ ما يريده ويظهر على حقيقته بعد الزواج ومثل هذا الرجل الذى عاش فى جو التسلط لا أنصح به يا إبنتى لإنك لا تستطيعين تغييره مهما فعلتى معه وإذا كان فى حد بيتغير فقليل جدا ونادرا لذلك بأردد دائما أن العريس الموجود فى أسره إسلاميه تتبع تعاليم الإسلام هو أفضل عريس لإنه عارف ربنا كويس وعمره ما هيهينك ولا يذلك وهيكرم عشرتك .
5- علاقاته الإجتماعيه :- لابد أن تتعرفى على طبائعه من البدايه وهل يحب العلاقات الإجتماعيه مع الأسر الأخرى والأقارب أم لا (وطبعا بدون اختلاط ).
تعرفوا ياجماعه انا أكتر حاجه بحبها فى عادات دول الخليج هى التزامهم بمبادئ الدين فى الزيارات الإجتماعيه وهو إن الستات لها مكان مخصص لها والرجاله أيضا وبذلك لا يتطلع الرجاله على عورات النساء والعكس وبذلك تجنبى نفسك مشكلات لا حصر لها نتيجة الإختلاط وبالفعل رأيتها بأم عينى من مقارنة الزوج بين زوجته وصديقتها من حيث المظهر واللباقه فى الكلام فلماذا تضعى نفسك فى هذا المأزق إتفقى معاه من الأول إنك مبتحبيش الإختلاط لإن فى ذلك حمايه لكى أنتى أولا .
وبهذا يا أخواتى أكون قد إنتهيت ولله الحمد من هذا الموضوع وأسأل الله تعالى أن ينفع به أمة محمد وأن يستعملنا ولا يستبدلنا وأن يهدى بناتنا وبنات المسلمين وشبابنا وشباب المسلمين وأن يهدى أزواجنا وأن يحببهم فينا وإلينا وأن يهدى أولادنا لما فيه الخير لهم فى الدنيا والآخره آمين يارب العالمين.
والله كلامك جميل جدا
وفعلن معااكي حق في كل كلمه قلتيها
جزاكي الله الف الف خير على هذا الموضوع الهااام جدا جدا
وانشاء الله كل الاخوات بستفيدو من الموضووع
والله يعطيكي الف الف عاافيهple"][/COLOR]
يسلمو يا عسل
موضوعك حلو كتير ومفيد