من أفضل ما وصلني على الإيميل وحبيت تشاركوني وتقرأوها
الرساله جدا جدا رائعه …!
نقلتها كما وصلتني .نتقل إلى الرسالة على لسان كاتبتها ,في احدى المنتديات
========
السلام عليكم ورحمة الله وبركاته
حياكم الله
هذا أول موضوع لي في هذا المنتدى
ومتفائلة أنه يتثبت ويلاقي صدى حلو
لأني عارفة رقي العقليات الي بأحاورها
أنا لي شهرين أقرأ في هذا المنتدى
وبصراحة حاسة إني بين صديقاتي
أبهرني تعاونكم
وأهنيكم على المشرفات
ندخل في الموضوع.. وراح أتكلم بعفوية وتلقائية
لأن الكلام الي يطلع من القلب مباشرة يدخل القلب
أنا بنوتة عمري 23
تغيبت عن مجتمعنا السعودي 8 سنوات
ورجعت له من شهرين
بصراحة تفاجأت وانصدمت من التغيرات الي حاصلة
في المجتمع بكل فئاته وطبقاته .. في النوادي الرياضية..في الأسواق..والأهم في الجامعات والمدارس..وفي المنتديات والمدونات
تمنيت أني ألقى المجتمع تطور للأما.و تقدم للأفضل
لكني للأسف لقيت النقيض
رجوع خطوات للخلف.من جميع النواحي
قد يكون كلامي فيه غلظة شوي
بس يقول لك المثل
يا بخت من بكاني وبكى الناس علي
ولا من ضحكني وضحك الناس علي
تساؤلات كثيرة أرددها بيني وبين نفسي وما ألقى لها أي جواب
وأنا متأكدة أنها تت على كل رزين وعاقل شرواكم
هل لما زادت رفاهية الحياة يزداد تخلفنا؟؟
هل لما تطورالعلم وتسهلت الطرق له يزداد جهلنا؟؟
ليه صرنا مجتمع سطحي
لاهم ولا رؤية ولا رسالة ولا هدف من الحياة
التفكير والتركيز على المنظر والمظهر
فيه كاريكاتير أول ما شفته زعلت
لكن ألحين حسيت إنه أبلغ من كتب ممكن نكتبها
الكاريكاتير يمثل شعوب العالم
فمثل الشعب السعودي
بكرتونات مزينة وإذا فتحتيها لقيتيها فاضية
وهذا واقع البنات اليوم مظهر ومنظر
ولو تقولين لها 1 ×1 كم؟
تنحت
لو تقولين لها وش آخر كتاب قريتيه؟
قالت هاه
"بغض النظر عن الروايات التافهة الي طايحين فيها هالفترة"
———–
لو نص هوس المظاهر هذا كان على عقولنا لكنّا أنجح الشعوب
لأنه بساطة كل شيء متوفر عندنا
لا ناقصنا مال ولا قدرات عقلية
——————
الأجانب فلوسهم رايحة على تعليم عيالهم وتثقيفهم وصحتهم
تلقين راتب الأب والأم ضئيل ومستحملين شظف العيش عشان يرسلون ولدهم برى يدرس شهادة عليها القيمة
بينما عندنا يستحملون الديون والأقساط عشان تسوي زواج كله إسراف وتبذير وآخرته الناس طالعة منتقدة
وإلا ديون وأقساط عشان تقول صيفنا برى شهر كامل
والله أعرف وحدة شخصيا تقول السفر بالنسبة لي عذاب لأننا إذا سافرنا
طول السفر طقاق أنا وزوجي وأنا أحرسه لا تناظر وهو يحرسني لا تناظرين ..قلت طيب خلوا سفركم لبلدان محافظة أو لا تسافرون حطوا فلوسكم في البيت تغيير ديكورات وأثاث
عصبت قالت خير سلايفي لين سولفوا أصير بينهم ما سافرت
وإلا إذا سولفوا صديقاتي إلا أنا ما سافرت وش بيقولون عني
!!!!!!!
مافيه تعليق
———————–
أنا لما جيت بعد هذي المدة توظفت في بنك
ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها
وإذا جت العميلة الي مظهرها ما فيه بهرجة.. تستجدي الموظفات يجون يساعدونها
والمضحك في الوضع إني ألاقي العميلة البسيطة ما شاء الله حسابها شي وشويات..وهذي أم البهرجة حسابها بالسالب(عليها قروض وسيارات تقسيط)..وعنوانها يا إما شقة وإلا أجار
مو انتقادي على القرض ولا على السكن انتقادي
هو إنك مكلفة نفسك بالديون والقروض عشان شويتين نظرة إعجاب من الناس
بس ما ألومك لكن ألوم المجتمع الي صار سطحي..يحكم عليك بموديل جزمتك
—————-
أول تصنيفنا للمجتع كان
جامعية
مثقفة
عاقلة
متربية
قليلة أدب
دينة
بنت ما ربوها أهلها
يعني كان مقياسنا
الدين والتعليم والتربية
أما ألحين
صار تقسيمنا للمجتع
لو كلاس
هاي كلاس
بنت ستايل
بنت قروية
فعلا تصنيف متخلف رجعي سطحي
يعني رجعنا للجاهلية
وإحنا ألحين ننادي بالعولمة والعالمية والتطور والتحضر
الحضارة تبدأ بالعقول
——————-
من جد من كثر ما أنا منهارة من هالوضع والله مو عارفة وش أكتب
أروح لنادي رياضي ألاقي ملابس يستحي إبليس يلبسها
طبعا هذا غير الاسترتشات الي لما تتمد يطلع البنطلون شفاف..شيء يجيب الغثيان.. المشكلة نتدرب في كلاسات كلها مرايا يعني ماتستائين من منظرك!!!!!
المشكلة إن زمان كان هذا الشيء
نكرة + قلة تربية + قلة دين
أما ألحين
عادي وكنه العيد
————-
من أسبوعين اتصلت وحدة سعودية على فوزية الدريع قالت أنا معلمة كلمت واحد وحبيته وقال..و..و..وكملت تفاصيل حماقتها .. الي من جد فشيلة على القنوات ينقال أنه هذي سعودية
قالت لها الدكتورة
"..وش هالخداج معلمة وهذا عقلج.. أي جيل بتخرجين لنا..وين مخج..وين تربيتج "
الخداج: هو الجنين في بطن أمه إذا تعدى الشهر الخامس
يعني تعدينا مرحلة أنهم رجعوا للقة. هم رجعوا لما دون ذلك
—————————–
أخذت اللغة على يد أمريكية..عاشت في أمريكا 10 سنوات من زواجها و3 سنوات في السعودية..
لأنها متزوجة سعودي
تقول أنا توقعت السعودية بتسهل علي تربية عيالي لكن اكتشفت العكس
برى لما يشوفون غلط أقول لهم هم كفار ينبسطون شوي وآخرتها النار
بس إحنا مسلمين نحرم شوي وبنتمتع فورإيفر في الجنة
تقول وكانوا مقتنعين والأمور تمام
أما هنا لما يسألوني عن أشياء غلط يشوفوها في الفيصلية"والله كلامها نصا" أتلعثم وما ألاقي حجة مقنعة طبعا هم يعرفون كيف يحاورون عيالهم ما تقول له إلا كلام مقنع ومنطقي شوفي مخ عيالهم ومخ عيالنا
نرجع لها تقول صرت أقول لهم
"there are good muslims & bad muslims"
———————————-
فيه صرح رائع في عالم المنتديات اسمه مملكة
99% من مواضيعه عن المظاهروالشكل
هل عالم في قطعتين الملابس الي تلبسها؟؟
لا وكل مالها تتقلص هذي القطعتين
وين ثقافة ؟ وين أساليب الحوار؟؟ وين القضايا الدينية الي تخص المرآة؟؟
————————
يا كثر ما نسمع
ماتوقعت الزواج كذا ؟
انصدمت بالحياة اليومية في الزواج؟
ما قدرت أفهم زوجي…..
عارفين ليه لأن منتدياتنا النسائية
ثقافتها
"بسرعة بنات وين ألقى بانتي أحمر ..عشاني بألبس في الحفلة لو ويست"
وإلا
"مين أفضل مركز ينظف لي البكيني باليزر؟؟"
صارت البكيني منطقة عادي تطلع؟
تتقلبين على السرير بمنظر مقز ومقرف.. وبدون ولا نقطة حياء؟؟
والله لو أمك الي بتشيل لك باليزر كان استحيتي
وين الحياء؟؟
مات؟؟
وإلا نخنقه عشان ما يسيطر على تصرفاتنا؟؟
وإلا الي كان ماسك البنات شدة الأهالي؟؟ لما خفت شفنا الهوايل؟؟
وإلا الدين انحصر في صيام 30 يوم في السنة و5 صلوات في اليوم بس؟
كلها 8 سنوات تفاجأت وانصدمت
وما أدري متى أقدر أستوعب هذي التغيرات
الي أتمنى تتعدل للأفضل ولا أحتاج أستوعبها
أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان
أتمنى يصير الخطأ شيء عيب ما نتفاخر به ونعتبره مقياس على مدى حضارتنا
————————–
ليه صرنا نستحي من الدين ومن العادات
"أنا أتكلم عن العادات الصح مو المتخلفة"
تجي كوافيرا تقول لو ما عندك تحفظ على الإكستينشن أعمليها
!!
صارت المسألة تحفظ؟
صار العن أمر قابل للنقاش والتحفظ؟
صار الوصل ينصح به في المنتدى على مسمع من مايزيد عن خمس مية بنت
وياليت وحده ردت وقالت حرام
من واقعنا الكوافيرات أغلبهم انيات عقيدتها المسيح ابن الله
بس الشرهة علينا إحنا يا أمة لا إله إلا الله
لو ما كانت شايفة جرأتنا وتمردنا على الدين ما قالت كذا
هل كان التوصيل قبل عيني عينك يكتب في بروشور الصالون؟؟ جنب السشوار والتسريحة..
لو أقدم لك كريم وأقول لك لو ما عندك تحفظ على السرطان جربيه تراه يبيض
وش ردة فعلك؟
فيه ردة فعل غير إنك ترمينه علي..وتنبهين قرايبك منه .. وتحذرين البنات في المنتديات
—————————
وحفلات التخرج وحفلات النجاح والدي جيهات والزواجات
كلها معازف وأنواع التفن موسيقى وعود وأورج
وإلى آخر اليل وإلى الثلث الأخير.. وعادي .. ما فيه الي يقول للغلطان تراك تماديت بالغلط
آخر اليل إذا ربي تفضل علينا ونزل لسمانا الدنيا
هل من داعي؟ هل من مستغفر؟ هل من تائب؟
عذرا يا رب إحنا مشغولين مع محمد عبده وأحلام
دوروا الدنيا بكل أبعادها
هل فيه ملك ينزل لك كل ليلة ويقول لك " تبين شي؟ "
أتفه ملوك الدنيا تلقين عنده 10 سكرتارية وبينك وبينه 10 أبواب
والدخول عليه بموعد إن كان يتنزل يقابلك من الأساس
أعجبتني عبارة لداعية مصري قال:
" ربنا ينزل كل يوم ينادي حد عايز حاقة.. وإحنا مشغولين عنه.."
———————-
تجيك الوحدة تشتكي وقريتها هنا في المملكة
تقول ياربي أنا كنت أكلم واحد وحبيته
ولما تزوجت ما حبيت زوجي وتحملت قلة حبي له وبعد كذا اكتشفت إنه يكلم وحده وانهارت أعصابي
طيب.. وين الغريب في الموضوع
يعني قمة الخبث والخيانة
خنتي أهلك وربك وتبين واحد طاهر.. نظيف… قلبه عذري
مافي حياته إلا أنتي
وأنتي في حياتك عشرة قبله
عجب
!!!
——————————–
هذا غير الصور الشخصية وعبارات وصورالتوقيعات الي كلها إيحاءات سيئة وسخيفة
وفيديوهات التوقيعات هذي لها نصيب الأسد في السوء
إحنا أرقى من كذا
أبصم بالعشرة أن كل قارئات موضوعي هذا متعلمات.. جامعيات.. أو في طريقهم للجامعة
ليه أحط صورة فاتنة لو مر عليها ولد حركت غرايزة
لا تقولين هذا سيكشن خاص ب
أتوقع كلنا سعودين وأعرف الناس بشبابنا
قولي هنا ريحة حرمة وشوفي ردة فعلهم
وحتى؟أغلب العضوات يكتبون في أقسام أخرى والتوقيع والصورة ثابتة
لا تقولين هو لو يبي يشوف شاف
ما عليك منه عنده رب يحاسبه..بس لا تكونين سبب
يجي الشخص يوم القيامة تعرض عليه أعماله السيئة
أنتي كذبتي
أنتي أظهرتي مفاتنك لرجل
أنتي أخرتي الصلاة في اليوم الفلاني
أنت..
أنت..
أنت زنيت
يقول يا ربي ما زنيت
يقول له لكنك ساعدت أحدهم على الزنا
وكان عليك مثل وزره
والآية صريحة وحمدلله إننا عرب نفهمها بدون مترجم:
" ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون"
هذا إهداء للبنات الي يدخّلون الشباب للأسواق في أيام العوايل لما يمنعهم السكيورتي
هو بيدخل ويرقم وتبدأ علاقة أنتي السبب فيها
وهذا إهداء للي تدل على مواقع سيئة
وهذا إهداء للي ترسل رقم واحد لزميلتها
الواحد يالله يستحمل ذنوبه.. يروح يشيل ذنوب الناس
والرسول صلى الله عليه وسلم يقول
" أيما داع دعا إلى ضلالة فاتبع فإن عليه مثل أوزار من اتبعه من غير أن ينقص من أوزارهم شيء وأيما داع دعا إلى هدى فاتبع فله مثل أجورهم من غير أن ينقص من أجورهم شيء "
أخرجه مسلم
————————–
والموسيقى الي صارت زي السلام عليكم
أصلا صارت هي التحية والافتتاحية في المواضيع
في المنتدى سيكشنات مخصصة للأغاني
!!
وكأن الأغاني عادي مثلها مثل تبادل الأخبار وأسعار الأسهم
أفتح مواضيع هنا في مملكة
إلا مقطع الصوت تلقائيا شغال أورج
يعني بالقوة؟
ما دخلت سيكشن الأغاني..بس برضو مضطرة أسمعها؟
وهذا تجاوز للحدو والحريات
والمفروض يكون أحد شروط كتابة المواضيع منع هذا الشيء
لو بأنزل طبخة في وسط موضوعي
قلتوا: خير؟ غلطانه الأخت في العنوان
وبالنسبة للبنات الي ينزلون زفاتهم الموسيقية
كم وحدة مرت على الموضوع من الأعضاء وسمعتها
+
كم وحدة مرت على الموضوع من الزوار وسمعتها
+
كم وحدة بحثت في قوقل وطلع لها موضوعك
+
كم وحدة أعجبتها الزفة وحطتها في زواجها الي بتحضره 400 مدعوة
وعداد المعاصي شغال في ظهرك
وياطول الحساب
———————-
زميلاتي في ثانوي لما شفتهم
من كثر ذهولي
صرت أشك في نفسي
يعني لو وحده تغيرت تزعلين ويضيق صدرك عليها
لكن لما 6 كلهم تغيروا
وش ردة فعلك إلا العجب
لا.. وأمر الحواجب هذا أمر عجيب
ما أدري هل نزلت بعدي فتوى جديدة بجواز النتف؟
نتف وتاتو .. والضحكة شاقة فمها.. وكأن شيئا لم يكن
لو أقولها الله يلعنك بتزعل
لكن رب العالمين يمسّيها ويصبّحها على لعنة
إتز أوكي عندها
وإلا تجيك أم 14 سنة توها داخلة عالم النتف"عالم العن" أسفل حاجبها كله أخضر
فعلا.. صرنا على قول المصرين
نضحك على خيبتنا
—————————–
أما حكاية العبايات هذي يعني من جد كارثة
أقابل ربي في الصلاة محجبة
وأقابل الشباب في السوق بالعيون الي فيها كيلو مكياج والغرة المنسدلة
أي تناقض هذا؟
أي ديانة هذي؟
أي أخلاق؟
عبايات وإلا فساتين؟
القضية اجتاحت حتى الأمهات
حريم كبار والله الشعر الي فوق أذنها بدى يغزوه الشيب وتقول لي
تعرفين غرز الكروشيه بأحطه في عبايتي
يعني خافي الله في هالشيبات
جده والله العظيم
وش بقيتي لبناتك المراهقات
إذا أنتي بتزينين عبايتك بورد كروشيه
ماألومهم لو طلعوا من غير عبايات
————————
عشت في المجتمع الإماراتي حول سنة ونص
أحنا عارفين إن أهالينا محافظين أكثر منهم
وبلدنا محافظة أكثر
وموادنا الدينية في المدارس والجامعات أكثر
بس شوفوا حياتهم وتفكيرهم
كل بنت لها خطوط حمراء
هي حاطتها ومقتنعة فيها وفخورة بها
هناك المحجبة ترفع راسها بحجابها ومحد قدها
وعندنا هنا الي عبايتها ساترة ناقص تدخل في الجدار من الحياء
تخاف يقولون عنها متخلفة
ياإنها مسوية كابوس هذي الكلمة للبنات
تذبح أمها وأبوها بس لا أحد يهمس بكلمة متخلفة
هناك تلقين البنت تقرأ كتب عليها القيمة
مثل
"ذا سيكرت – نساء من الزهرة- أسعد امرأة في العالم- سلسلة شوربة الدجاج…"
هنا تلقين في يدها رواية للهابطين الي خسارة أكتب اسمهم هنا
————————-
نقطة إضافية
البلوتوثات والهوايل الي فيها
العين تزني وزناها النظر
لو أقول لك شوفي فيلم إباحي قلتي لا حرام
طيب وهذا
ليس إلا اقتباس لأقذر ما في الفيلم
!!
رسايل الجوال والنكت الجريئة
والله لو أقول لوحدة قولي الكلمة السوقية الشوارعية هذي بلسانك
قالت مستحيل بس لما تنكتب كرسالة جوال تصير كلمة عادية
لا ومضحكة بعد..تسمعين الضحكات الرنانة ..
ما أدري هل القذارة صارت تضحك؟؟
والله لو ولدك وإلا أخوك قالها
كان صرختي: عيب عليك ترى بأحرقك بالنار عشان تتأدب
—————————-
قبل أي فعل تقدمين عليه
لا تحكمين إيمانك لأن يمكن إيمانك ضعيف في هذي الفترة أو يمكن لا سمح الله أنه ما فيه إيمان في هالفترة
إحنا عارفين عقيدتنا تقول الإيمان يزيد بالطاعات وينقص بالمعاصي
ولا تحكمين قلبك لأنه ممكن قلبك يكون قاسي في هالمرحلة
حكمي عقلك لأن العقل هو نفسه ما يتغير
قولي هل لو كنت مريضة لا سمح الله بأسوي هذا الشيء
إذا الجواب إيه
أقدمي معناها إنه حلال وخير ولا تستحين منه إذا قابلتي ربك
وإذا الجواب لا
معناها تراك تجاوزتي حد مع ربك.. وبيكسر هالشيء عينك أنك تقابلينه وأنتي مسويته..
أي عمل قولي هل لو سويته بيكسر عيني مع ربي لو بأقول يارب اشفني وإلا يارب عطني
————————————–
دعوة عملاقة أبعثها من هالمكان الراقي
حملة أتمنى نبدأها ونكون قدها ونوصلها ونسمعها الجميع
كفى..استهتارا
كفى ..تراجعا
كفى ..تنازلا
قومنا حملة لا للكوافيرت الغاليات ونجحت
وقومنا حملة السعودية للسعودين فقط ولقت صداها
شدوا الهمة وساعدوني
أثروا الموضوع بردودكم الهادفة
يا صاحبة الدين..أضيفي كلمة تشهد لك يوم القيامة..مو الدين في غرفتك تصلين وتصومين وإذا شفتي الغلط غمضتي عيونك وسكتي عنه..هذا اسمه شيطان أخرس
ياصاحبة العقل الرزين..أدلي بدلوك.. نورينا بآرائك الهدافة
ياصاحبة الثقافة..ساهمي في تثقيفنا
هذا الي جرأ بنات الغلط على المجاهرة..وهو إن صوت أهل الدين والعقل والرزانة واطي
علوا أصواتكم خلونا نسمعها ونسمّع غيرنا
———–
نبي وحدة تكون شجاعة وسباقة للخير
أكتبي هنا أنا غيرت صورتي الشخصية أو توقيعي
يله عشان تشجعين غيرك ويحذو حذوك
وتأخذين أجره
———-
نبي وحدة شجاعة نبيلة تقول أنا مسحت موسيقى كنت منزلتها في موضوعي
أو زفة نزلتها للبنات
————————-
نبي وحده شخصيتها قوية تقول أنا مسحت صور شهيرات هوليود من موضوعي لأن ملابسهم عارية
نقدر نزل صور بتضليل خفيف يكسر جرأة الأفخاذ والصدور الي طالعة
———————————
خلوا شعارنا
الرجوع عن الخطأ خير من التمادي فيه
————————–
حقوق الطبع غير محفوظة
أنشروا في المنتديات والمدونات والإيميلات
خلونا نرتقي بمجتمعنا
خلي لك بصمة في الحياة
————————-
يارب هذا أقل ما يمكن أسويه
بس أتمنى أنك تعذرني به
أنا وكل من خطت حروفها هنا إنكارا للواقع المرير
محاولة بسيطة للتصحي. تقبلها مننا يارب
————————-
لا تقولين المجتمع كبير ومتنوع وصعب أصلحه
المجتمع هو
أنا وأختي وأنتي واختك وهذي العضوة واختها وبنات خالاتنا وبنات عماتنا
والسلام عليكم
أترياكم
——-
مخرج
أصدر المولى بيانه . . . أين أنتِي يافلانه
إفتحوا ديوانها ول . . . تنظروا في كل خانه
موقف صعب رهيب … أسأل الله الإعانة
حين أدنو من إلهي … دون ستر أو بطانة
يحاكيني جهارا … كيف أديت الأمانة
حينها تشعر مثلي . . . أنها حقا جَبَانه
كم قضيت العمر هدراً . . . بين غيٍّ ومَجَانه
يا لقلب السوء أرخى . . . للهوى العَاتِي عَنَانَه
في متاهات المعاصي . . . يخسر القلبُ رهانَه
من يجيب الله عني؟! . . . من سيعطيني لسانه
لحظة من هولها لا . . . يملك العقل اتزانه
ضاع مفتاح النهى . . . واختَّل ميزان الرزانه
جزاها الله خير وكثرمن امثالها…
قرأته بين هذه السطور
وفقها الله وسددخطاها
وجزاك الله خيرآ على روعة النقل
طرح مميز جدآ من واقع نعيشه
يستحق التميز والتقييم
الله يجزيها كل خير ويوفقها ويهدينا جميعا