اعزائي: اليوم بندردش (حكاية في رحلة) ولو طولنا عليكم, العذر والسموحه
مساء يوم الثلاثاء خامس ايام العيد إتصلوا اولاد عمي من جده ….
ايش رأيك تكمّل عندنا العيد تجلس يومين تغير جو ,وتشم هواء جدة, وتستمتع بالبحر ,
أحسن من جلوسك في الرياض مع جوها الناري, عجبني الكلام وبالمره آخذلي عمره
على طريقي ولا انسى (بروست البيك )
في الصباح رتبت اموري ومريت على الوالده الله يحفظها وثم على السياره أستعد للرحيل
شوي الوالده جايبه معاها كيس ايش هذا قالت هذا قرص خمير تفك ريقك,,
يمه الله يعافيك خمير على الصباح ؟ قالت خذ هذا منه الفايده وأخذت تعدد فوائد الخمير…
أخذته وحطيته جنبي وشغلت السيارة و على بوفيه الشباب أخذت الفطور ومسكت الخط…
بفضل من الله انا احب مشي البر لمسافات طويلة وايضاً بيني وبين الطيران تنافر لا انا بحبه
ولاهو بيودني ,في اول محطه خارج الرياض عبيت ثلاجة القهوة وترمس الشاي بالنعناع..
وطول الخط هات ياقهوه وخذ ياشاي,,,
وصلت الميقات أخذت غرفه وريحت شوي ,, بعدها على مكه , وقفت سيارتي
بداية مكه بجوار (البيك) أخذت ليموزين على الحرم…
سويت العمره ولله الحمد ورجعت دايركت على البيك,,, واو ,, ايش هذي الزحمه امري لله
مسكت طابور وأخذت الرقم ول ول ول قدامي 114 ياساتر يارب ما اخفيكم مع ريحة البيك
وزحمة الناس والجوع بدأ جسمي يتنافض , لين جاني الدور أخذت الطلب ,, أفكر فين آكل
في البيك صعب ,, المحل مليان,, ومن لهفتي مأخذ حبه كامله (قولوا ما شاء الله)
ثانياً بعد ما آكل خايف اتنح وانام على الطريق ..ركبت سيارتي وبدت المعاناه الحقيقية
انا ما ادل الطريق زين واللوحات شبه معدومة وهات يامعمعه اسأل فلان واسأل علان
واتصالات على جده لعلي الاقي المنقذه ومافيه فايده طافت اكثر من ساعتين وانا ادور في
حلقه مفرغه بعد ما استويت اخيراً ربي هداني وقفت ليموزين قلت له وصلني طريق جده
قال 25 قلت وصلني وخذ اللي تبغاه,,, الرجال ماقصر وصلني الى محطة آخر مكه اول طريق
جده,, بسرعه حطيت الفرشه وجلست انا والبيك لوحدنا ,, فجأه يادوب قلت بسم الله
الاقي اربع بساس ثنتين منهم يمونوا علي قاعدين على الفرشه,,
لاحول ولاقوة الا بالله ايه اللبشه اللي انا فيها ,,,, مابليد حيله ارمي لهم بعيد لعل وعسى
هذا البيك الله يهديكم ,, مافيه فايده المهم طارت الحبه الأمر لله..
اكلت بسرعه …. ومشيت وصلت جده منتهي مره,,, وعلى السرير
المرحلة الثانيه
مساء الخميس قالوا الشباب يالله على البحر ,,, انا فرحان,, وصلنا البحر بعد معاناه مع السير
على البحر شفت العجب العجاب,, شباب هايصين لايصين قلت ايش هذا ؟؟
قالوا هذي الموضه يابو الشباب ,, انت جاي من مكان منغلق,,
ثلاثه شباب قدامي لابسين ( سامحني يابابا ) ( السكيني ) (وطيحني)
سامحني يابابا: بنطلون مايع له سحابين أمام وخلف
طيحني : بنطلون اميع من الاول الحزام ينحط على؟؟؟؟؟؟
السكيني: بنطلون لاصق على الجسم ( تستحي بعض النسوان تلبسه لزوجها)
لا إله الا الله .. اولاد عمي يالله البيت البيت نلعب البلوت من البلاوي هذي…
أخذوا بخاطر (المنغلق) ومشينا للبيت….
بعد الغداء وشرب الشاي (بالنعناع) أخذت الملم اغراضي استعداداً للسفر,,
شوي نفسي توشوشني ايش رأيك تمر على البيك يمكن تجوع على الطريق؟؟
البيك ثاني لا لا لا لا
عمتي عمتي الحقيني بقرص خمير ابمسك خط إلى الريااااااااااض
الردوود
دوماً سنكون بانتظار المزيد من روائعك
مع كل آلود وآلورد لقلبك
…
فدو
