اهلا يا ابنات
طبعا شهر رمضان كلنا بنهتم بيه جدا وبنحاول نعدى الشهر ده على خير وطبعا احنا خلاص قربنا اوى فاضل شهرين بس طب هنعمل فيه ايه بقى
طبعا بنصرف فيه كتير اوى وبنخرب الميزانيه خالص وكمان العزومات ياخبر مصاريف جامده
وكمان بنحتار فى الوقت عايزين نوفر الوقت علشان نهتم فيه بالصلاه والجانب الدينى
وكمان بنحتار نعمل ايه اكل كل يوم والحلويات وغيره
ياه ياخبر حاجات كتير اوى صح
علشان كده انا عملت الموضوع ده كلنا نفيد فيه بعض ازاى نوفر فى طلباتنا
وكمان نساعد بعض فى اننا نعمل جدول للاكلات للشهر تفيدنا وتريح علينا
وكمان نفيد بعض فى اننا ازاى نوفر وقتنا فى المطبخ
يلا انا عايزه تفاعل كبير منكم وكل واحده تدخل تفيدنا بمعلومه مهمه تساعدنا ازاى نحضر للشهر الكريم ده
وكمان لو فيه اكلات حلوه اهى تساعدنا وكمان نوع فى الاكل
استنونى هاقولكم ازاى نستعد للشهر الكريم ده ونوفر مصاريفه ازاى وكمان جداول الاكل
هاستنى مشاركتكم كلكم وكمان التقيمم والدعوه الحلوه
وكمان بجيب السنبوسه واعملها واحطها في الفريزر
واطلع منها علي التحمير
والفول انا بعمله في البيت
نحاول نخزن الحاجات ال تنفع وتساعدنا فى تجهيز الاكل بسرعه
زى الخضار بكافه انواعه
اللحمه المفرومه نعصجها ونشيلها فى الفريزر
الطماطم نسبكها ونشيلها على اد الاكلات
البصل والثوم نفرمهم ونخزنهم
الفراخ لبانيه نتبلها ونحطها فى البقسماط ونشيلها
الكفته نعمل كفته الرز ونحمرها ونخزنها وكمان الكفته المشويه
اللحمه نسلقها ونشيلها فى الفريزر مع شوربتها
نشتري لوازم الشهر الفضيل كلها ونحطها في مكانها
اعمل جدول لاكل اليوم مثلا السبت: شوربة, سلطة , كباب, ورز مع صينية دجاج , مهلبية /الاحد: شوربة ,سلطة ومخلالات. سمك ورز.زبادي .كريم كراميل من غير البقلاوة وزنود الست
والعصائر والمكسرات دي بقة في اليل
واقسم مصروف البيت الشهري اربع اقسام كل قسم اضعة في ظرف واستعمل المصروف الي في الظرف لمدة اسبوع ولا امد يدي على الظرف الثاني حتى لو احتجت والحقيقة الكلام كثير
نحفظ السمك الفيليه بعد مانتبله او الجمبرى نتبله ونحفظه فى الفريزر
نحفظ خضره المحشى نغسلها ونسيبها تنشف ونقطعها ونكيسها على اد الاكله
بصوا بقى اولا احنا نجمع الافراد على اد مانقدر يعنى مره عزومه لاهلك ومره عزومه لاهله يعنى تجمعى الافراد كده
ثانيا حاولى توفرى شويه فى اصناف الاكل اولا الكل عارف ان معظم الناس اكلها بيبقى ضعيف فى رمضان بسبب الحر وبيبقى همنا الاول والاخير المشوربات صح فليه بقى نزود فى الاكل
ثالثا اللحمه المفرومه بجد موفره جدا فى العزومات يعنى بتنفع فى كل حاجه الصوانى الكفته سواء المحمره او المشويه بتبقى بجد حاجه تشرف
رابعا تعملى مثلا صنف او صنفين من اللحوم بس مش اكتر من كده
خامسا الاكل ال هيفيض من العزومه هيبقى فطار ليكى ولولادك لليوم التالى طبعا لازم توفرى شويه
سادسا اهتمى بالعصاير والشوربات والسلطات وهتبقى عزومه تحفه بجد من غير اسراف
سابعا تعملى الحلويات فى البيت اهو توفير ونضافه يعنى صنف ولا صنفين كفايه اوى لو عدد الافراد كان كبير شويه ولو كان قليل كفايه صنف واحد
الفواكه تجمد بالفريزر كما هى الفراوله والجوافه والمشمش والخوخ نزع النواه ونكيسهم وعلى الفريز على طول ولما نحتاجهم نطلعهم وعلى الخلاط مع السكر
المانجا نقشرها ونقطعها شرائح ونكيسها على طول ولما نحتاجها نطلعها ونعملها عصير
البرتقال نعمل منه عصير بدون اضافات ونكيسه فى الفريزر ولما نحتاجه نخرجه ونحط السكر ونعمله عصير على طول
وكمان المشمش والتين نحفظهم فى الثلاجه على طول
المشمش يا بنات لما بيتعمل بالزبادي واللبن بيبقي روعة والفراولة كمان
والجوافة
عايزة اجيب لحمة مفرومة واعصجها للبشاميل والكفتة اتبلها واصبعها واشيلها في الفريزر
وما تنسوش كمان كام ورقة جلاش وع الفريزر تنفع حلو او حادق والجلاش اللي بالبسطرمة والجبن والفلفل الرومي والزيتون بيبقي تحفة
وعايزة افرز طماطم متسبكة
واجيب نص لوبيا واسلقة واقسمه علي مرتين وفاصوليا بيضاء نص علي مرتين
وبانية ويتبل ويتشال في الفريزر
السمنه يابنات بتغلى خالص فى رمضان والعيد
ياريت نحاول نشترى من دلوقتى الكميه ال هتكفينا فى رمضان وكمان تكفينا فى العيد
علشان منشتريش وهى غاليه
يتبع ويلا حطو افكاركو معى
وكمان نخزن البطاطس على القليه بس
وهقول ليكو ازاى نخزن البطاطس
طريقة ممتازة ومجربة هاتى البطاطس الصحراوى الخاصة بالقلية وقطعيها صوابع وتكونى محضرة حلة وفيها ماء مغلى وحطى شوية خل ومتح وحطى البطاطس وخليها تغلى لمدة دقيقتين وبعدين حطيها فى مصفاه لغاية لما تبرد وعبى كل كيس على اد طاسة لان عند القلية بتوضع فى الزيت وهى مجمدة وفى زيت ساخن وغطى عليها بعد كام دقيقة تلاقيها فكت من بعضها وتتحمر عادى خالص جربيها لو فى كميه بسيطة الاول وبعدين ردى عليه بعد تجمدها واستعمالها وان شاء الله مش حتندمى
………………………… ………………………… ………………
ممكن قبل رمضان باسبوع مثلا هاتي 2أو 3ك كنافة وقسميهم في اكياس علي حسب افراد عائلة وعلي الفريزر
هاتي 2ك قطايف واحشيها مكسرات وعلي الفريزر وممكن تحشي جزء منها جنبة علي نعناع او جنبة وزيتون او جبن رومي او بسطرمة وشيلها جاهزة علي القلي
اللحم المفروم هاتي وتبيليه للكفتة وجزء اخر للعصاج وعصجي وشيلي
ممكن نجيب لحمة ونسلقها بس مش تستوي اواي تتقسم وتشال مع حبة شوربة ولما تيجي تطلعها حطيها في الخضار تكمل سواها
تبلي البانية والفتيك يعني طلعيه علي البيض والبقسماط والقلي
هاتي السمك ونضفيه وقسميه
يلا ضعو ا افكاركو ولو قرأتو موضوعى قيموتى من الميزان
وكمان لما تجربو الى قلت عليه قولولى انتو عملتو ايه
اللهم بلغنا رمضان واعنا على حسن طاعتك
هو موضوعى مش عجبكم
موضوعك حلو جدا ان شاء الله البنات يتفاعلو معك
عن نفسي الاعتماد كله على امي
تسلم يدك