خيرت الناس عربهــا ….. حشمت أفكل طاغوت بيخربهـا
بلا أمبالغة خيرت الناس عربهــــــــــــــــــــــا
هي الشــرارة ….. أسأل عليها الطاغية وأصغـــارة
… وأسأل أمريكا وين دارت غــارة …. طيار رد أوقال ما نضربهـــا
… هلها تريس أومن زمان عصــارة …. أسأل عليها الطاغية جربهـــا
جانا أبجيشه دمروه نصـــارة …. ربي حماها ما بلا يقربهـــــا
أوفيها نوادي النصر والجــزارة …. دم الشباب وطاتنا شربهـــا
ربايت الذايح دايمآ نــوارة …. قهرت الطاغي أوعيلته أيطربهــــا
بنغازي عظيمــــة ….. بوغصاص كانت لاه ديمـــــة
مايوم دارتله أهتمام أوقيمـــة …. أبتهميشته الهلها غبي دربهـــا
مالسبعين ثورتها قديمــــة …. لا تبيه لا هوة رغبهــــــا
بنغازي عروســــه …. أسأل البغدادي أوموسى كوســــه
والزاوية وأسأل جبل نافوســــه …. صبت المصراته أفعز كربهــــا
وأسأل العالم حركت ناموســـه …. شافوا الطاغي جاي وأبيضربهــــا
وأسأل أيش فيها قال عمر موســـه …. تهديد بنغازي العرب ريبهـــا
بنغازي مواقف ناسها ملموســــه …. علي ما رهبها ما أقدر يغصبهــــا
أشهر مدينة في ربوع الكـــون …. أوفي سوريا ساحة أسمت بيهــا
وأبأسمها قرار جاء معلــــون …. أوهي صقع عالطاغوت يوصل فيهـــا
في ليبيا هي قلبها الحنـــــون …. أتربيه كل ذايح غريب أيجيهــــا
خلت الطاغي في غضب مجنـــــون …. وين قال من أنتم أنجن أنسيهـــا
الكل ليبيا كانت سند أوعـــــون …. مصراته حضت بقصص تو تحكيهــــا
عمارت التأمين وين أتكــــون …. من خش نظفها أوبقا حاميهــــــا
والعاصمة من دار فيها لــــون …. لسلاح يشهد وأسألوا شاطيهـــــا
حتا أفجبلنا عندنا عربـــون …. أفنالوت وأفيفرن أوضواحيهــــــا
في كل موطن عندنا مدفــــون …. كل الأراضي دمنا راويهـــــا
علي أبلادنا موحال يوم أتهـــون …. بنغازي عظيمة فتشوا ماضيهــــا
أتقول دار ساركوزي أبها واشــــون …. جاء المحكمة مصر بيحييهـــــا
بنغازي حبيبتنا أوزها لعيـــــون …. اللي أيسوسها يفعل اللي ترضيهـــــا
مفروض ترقا فالقمر أتكــــون …. أفقلبي جميع المدن ما أتساويهــــــا
هي سيف ربي أفليبيا المسنــــون …. أمعمر بكا وين دمروا غازيهــــا
لو كنت مش منها أنتمنا أنكــــون …. لولي جربهــــــا
أسحا أتجرب يا جديد غضبهــــــــا
خيرت الناس عربهــــــا …… حشمت أفكل طاغوت بيخربهــــــا
و في الأخير إنقولكـ
انتي قمر فوق النجوم ..والعين ماتعلي علي حاجبها .
ولو عندي للقمر سلوم ..كلمة "نحبك" علي القمر نكتبها..
غالي وقلبي في سماك ايحوم ..ولو في بحرك المحبه ذايبة نشربها..
… ولو عندي للغوالي سوم.. انبيع عمري ومحبتك نكسبها ..